ആലപ്പുഴ: സംസ്ഥാന സര്‍ക്കാരിന്റെ ഒന്നാം വാര്‍ഷികത്തോടനുബന്ധിച്ച് സര്‍ക്കാരിന്റെ പ്രധാന വികസന നേട്ടങ്ങള്‍ പ്രതിപാദിക്കുന്ന പ്രദര്‍ശന വാഹനം-നവകേരള എക്‌സ്പ്രസ് ഇന്ന് മുതല്‍ 13 വരെ ആലപ്പുഴ ജില്ലയില്‍ പര്യടനം നടത്തും.
ജില്ലയിലെ ആദ്യദിനത്തിലെ പര്യടനം ഇന്നു രാവിലെ 9.30ന് കായംകുളം നിയോജകമണ്ഡലത്തിലെ തട്ടാരമ്പലം കൊല്ലനട സ്‌കൂളിനു സമീപം നടക്കുന്ന ചടങ്ങില്‍ അഡ്വ. യു. പ്രതിഭാഹരി എം.എല്‍.എ. ഉദ്ഘാടനം ചെയ്യും. തുടര്‍ന്ന് വൈകിട്ട് മൂന്നിന് അരൂര്‍ പള്ളിപ്പുറം, അഞ്ചിന് അര്‍ത്തുങ്കല്‍ ബീച്ച്, ഏഴിന് ആലപ്പുഴ ബീച്ച് എന്നിവിടങ്ങളില്‍ പര്യടനം നടത്തും.
നാളെ ആലപ്പുഴ ടൗണ്‍ ഹാള്‍, രാമങ്കരി, ചെങ്ങന്നൂര്‍, പാലമേല്‍ എന്നിവിടങ്ങളിലും ജൂണ്‍ 13ന് ആലപ്പുഴ കെ.എസ്.ആര്‍.ടി.സി. ബസ് സ്റ്റാന്‍ഡ്, മാരാരിക്കുളം, ചേര്‍ത്തല കെ.എസ്.ആര്‍.ടി.സി. ബസ് സ്റ്റാന്‍ഡ്, തണ്ണീര്‍മുക്കം എന്നിവിടങ്ങളിലും പര്യടനം നടത്തും. കടമ്പനാട് ജയചന്ദ്രനും സംഘവും പ്രദര്‍ശന വാഹനത്തിന് സ്വീകരണം നല്‍കുന്ന കേന്ദ്രങ്ങളില്‍ നാടന്‍ കലാപരിപാടികള്‍ അവതരിപ്പിക്കും.
നവകേരള സൃഷ്ടിക്കായുള്ള നാലു മിഷനുകളെക്കുറിച്ചും വിശദമാക്കുന്ന ത്രിമാന മോഡലുകള്‍, സമീപകാലത്തെ വികസന- ക്ഷേമ പ്രവര്‍ത്തനങ്ങളുടെ ചിത്രങ്ങള്‍ തുടങ്ങിയവയും വാഹനത്തില്‍ സജ്ജീകരിച്ചിട്ടുണ്ട്.