കോഴിക്കോട്: പാലാ ഉപതെരഞ്ഞെടുപ്പില്‍ യു.ഡി.എഫിന് ചിഹ്നം പ്രശ്‌നമല്ലെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍.
ഏതു ചിഹ്നമായാലും പാലായിലെ ജനങ്ങള്‍ യു.ഡി.എഫിനെ വിജയിപ്പിക്കും. ചിഹ്നം ചൂണ്ടിക്കാട്ടി സംസ്ഥാനം നേരിടുന്ന ജനകീയപ്രശ്‌നങ്ങളില്‍ നിന്ന് ശ്രദ്ധ തിരിച്ചുവിടാമെന്ന് ആരും വ്യാമോഹിക്കേണ്ട.
പാലായിലെ ജനങ്ങള്‍ പ്രബുദ്ധരാണ്. കേന്ദ്ര, സംസ്ഥാന സര്‍ക്കാരുകളുടെ ജനവിരുദ്ധ നിലപാടുകള്‍ക്കെതിരേയുള്ള വിധിയെഴുത്താകും പാലായിലെ ഉപതെരഞ്ഞെടുപ്പ്. ലോക്‌സഭാ തെരഞ്ഞെടുപ്പിലെ തനിയാവര്‍ത്തനമായിരിക്കും പാലാ ഉള്‍പ്പെടെയുള്ള ഉപതെരഞ്ഞെടുപ്പുകളില്‍ ഉണ്ടാകുക.
കോടികളുടെ ഇടപാടുകള്‍ നടത്തുന്ന കിഫ്ബിയില്‍ സി.എ.ജി പരിശോധന നിഷേധിച്ച സംഭവം അംഗീകരിക്കാന്‍ കഴിയില്ല. ഒളിക്കാന്‍ ഒന്നുമില്ലെങ്കില്‍ സി.എ.ജിയെ എതിര്‍ക്കുന്നതിന്റെ കാരണമെന്തെന്ന് ധനമന്ത്രി വിശദീകരിക്കണം. സി.എ.ജി ഓഡിറ്റിങ് തടയാനുള്ള നീക്കം സംശയാസ്പദമാണെന്നും മുല്ലപ്പള്ളി കൂട്ടിച്ചേര്‍ത്തു.