കൊണ്ടോട്ടി: പാലക്കാട്-കോഴിക്കോട് ദേശീപാത കൊണ്ടോട്ടിക്കടുത്ത് പാണ്ടിക്കാട് ഡിവൈഡറും സീബ്രാലൈനുമില്ലാത്തത് അപകടം വര്‍ധിപ്പിക്കുന്നു. മഹാകവി മോയീന്‍ കുട്ടി വൈദ്യര്‍ അക്കാദമിയുടെ മുന്‍വശത്ത് ദേശീയ പാതയിലാണ് ഡിവൈഡറും സീബ്രാലൈനും വേണമെന്ന് ആവശ്യമുയര്‍ന്നത്. മാപ്പിളപ്പാട്ട് പരിശീലനത്തിനായും ലൈബ്രറിയിലേക്കുമായി നിരവധി പേരാണ് അക്കാദമിയിലേക്ക് എത്തുന്നത്. ഇവര്‍ക്ക് ദേശീയ പാത  മുറിച്ചു കടക്കാന്‍ ഏറെ പ്രയാസമാണ്.
അപകടമായ വളവില്‍ ഇരുഭാഗത്തു നിന്നും എത്തുന്ന വാഹനങ്ങള്‍ കാണാന്‍ കഴിയാതെ വരികയാണ്.റോഡരികില്‍ വലിയ വാഹനങ്ങള്‍ പാര്‍ക്ക് ചെയ്യുന്നതും അക്കാദമിയില്‍ എത്തുന്നവര്‍ക്ക് ഏറെ പ്രയാസമുണ്ടാക്കുന്നു. നൂറിലധികം വിദ്യാര്‍ഥികളാണ് അക്കാദമിയിലേക്ക് എത്തുന്നത്. ഇവര്‍ക്ക്  ഇരുവശത്തേക്കും റോഡ് മുറിച്ചു കടക്കാന്‍ ഏറെ പ്രയാസപ്പെടുകയാണ്. ഡിവൈഡറും സീബ്രാലൈനും സ്ഥാപിച്ച് പ്രശ്‌നത്തിന് പരിഹാരം കാണണമെന്ന് വൈദ്യര്‍ അക്കാദമി ആവശ്യപ്പെട്ടു.