പാലക്കാട്: പുഴകളെ സംരക്ഷിക്കാന്‍ തീരദേശ സംരക്ഷണ നിയമം പോലുള്ള ശക്തമായ ചട്ടങ്ങളുണ്ടെങ്കിലും അവയെയെല്ലാം കാറ്റില്‍ പറത്തി റിസോര്‍ട്ട്, ഫ്ളാറ്റ് സമുച്ചയ ലോബികള്‍ കേരളത്തിലെ പുഴകളെ'വിഴുങ്ങു'ന്നു.
സംസ്ഥാനത്തെ പടിഞ്ഞാറോട്ടൊഴുകുന്ന 41 പുഴകളും അവയുടെ 35 കൈവഴിപ്പുഴകളും ഭീകരമായ കൈയേറ്റം കാരണം ശ്വാസം മുട്ടി മരിച്ചുകൊണ്ടിരിക്കുകയാണ്.
പുഴയോരത്തെയും കടല്‍ത്തീരത്തെയും ചൂഷണത്തില്‍ നിന്നു സംരക്ഷിക്കാനാണ് സുപ്രധാനമായ തീരദേശ പരിപാലന നിയമം (സി.ആര്‍.ഇസഡ് ആക്ട്) നിലവില്‍ വന്നത്.
'സി.ആര്‍.ഇസഡ്'ചട്ടം പാലിക്കാതെ പുഴയോരത്തും കടല്‍ത്തീരത്തും കെട്ടിടനിര്‍മാണത്തിന് അനുമതി കൊടുക്കരുതെന്നു കര്‍ക്കശമായ വ്യവസ്ഥയുണ്ട്.
ചട്ടങ്ങള്‍ പാലിക്കാതെ ഇത്തരം നിര്‍മ്മാണ പ്രവര്‍ത്തനങ്ങള്‍ക്ക് അംഗീകാരം നല്‍കിയ ഉദ്യോഗസ്ഥര്‍ക്കെതിരെ വിജിലന്‍സ് നടപടിയുണ്ടാകുമെന്നുമുണ്ട്.
എന്നാല്‍, ഇതെല്ലാം തൃണവല്‍ഗണിച്ചു നൂറുകണക്കിനു നിര്‍മിതികളാണ് ഉണ്ടാകുന്നത്.
ഇവയില്‍ പത്തും പതിനഞ്ചും അതിലേറെയും നിലകളുള്ള വന്‍കിട ഫ്ളാറ്റുകളും കോടികള്‍ വാരിവിതറി നിര്‍മിച്ച വില്ലകളുമുണ്ട്. അവയെല്ലാം വന്‍തോക്കുകളുടേതായതിനാല്‍ നിയമം നോക്കുകുത്തിയാവുകയാണ്.

പുഴയോരങ്ങളും കായല്‍ത്തീരങ്ങളും പണച്ചാക്കുകള്‍ മത്സരിച്ചു വാങ്ങിക്കൂട്ടുകയാണ്. കേരളാ മുന്‍സിപ്പാലിറ്റി ബില്‍ഡിങ് ചട്ടങ്ങള്‍ പ്രകാരം ലംഘനങ്ങള്‍ കണ്ടെത്തി അനുമതി നല്‍കാതിരുന്ന പല കെട്ടിടങ്ങള്‍ക്കും ടൗണ്‍ പ്ലാനിങ് സ്റ്റാന്‍ഡിങ് കമ്മിറ്റിയുടെ നിര്‍ദ്ദേശപ്രകാരം പിന്നീട് അനുമതി നല്‍കുന്നതായി സി.എ.ജി റിപ്പോര്‍ട്ടില്‍ പറയുന്നുണ്ട്.
ഈ വര്‍ഷവും കഴിഞ്ഞ വര്‍ഷവും കേരളം പ്രളയജലത്തില്‍ മുങ്ങാന്‍ കാരണം മഴ ശക്തമായതിനേക്കാള്‍ പെയ്ത മഴവെള്ളം കടലിലേയ്ക്കു സുഗമമായി ഒഴുക്കിവിടാന്‍ പുഴകള്‍ക്കു കഴിയാതെ പോയതാണെന്നാണു പരിസ്ഥിതി ശാസ്ത്രജ്ഞന്മാര്‍ പറയുന്നത്. പുഴകള്‍ കൈയേറിയതാണ് അതിനു കാര ണമായത്.
പുഴയോരം കൈയേറിയുള്ള നിര്‍മ്മാണങ്ങള്‍ക്കെതിരെ പരാതി ലഭിച്ചാലും കാര്യമായ നടപടിയുണ്ടാകാറില്ലെന്ന് ആരോപണമുണ്ട്.
ഭരണഘടനയുടെ 48 എ, എസ്.ഐ.എ (ജി) വകുപ്പുകളനുസരിച്ചു നദീസംരക്ഷണം സര്‍ക്കാരിന്റെ ചുമതലയാണ്. പഞ്ചായത്ത് രാജ് ആക്ട് 218 പ്രകാരം ജലസ്രോതസ്സുകളുടെ സംരക്ഷണം ഗ്രാമപഞ്ചായത്തിന്റെയും നഗരസഭകളുടേയും ബാധ്യതയാണ്.

2002 ല്‍ പ്രാബല്യത്തില്‍ വന്ന നദീതട സംരക്ഷണവും മണല്‍ വാരല്‍ നിയന്ത്രണ നിയമവും നദീ സംരക്ഷണത്തിന്റെ അനിവാര്യതയാണു വ്യക്തമാക്കുന്നത്.
നദികളുടെ സംരക്ഷണത്തിനായി ജില്ലാകളക്ടര്‍ ചെയര്‍മാനായ വിദഗ്ധസമിതി രൂപീകരിക്കണമെന്നുണ്ട്. തദ്ദേശസ്വയംഭരണ സ്ഥാപനങ്ങളുടെയും റവന്യു, പൊലിസ്, ഇറിഗേഷന്‍, പൊതുമരാമത്ത്, മൈനിംഗ് & ജിയോളജി, തൊഴില്‍ വകുപ്പുകളുടെയും ഉത്തരവാദപ്പെട്ട പ്രതിനിധികള്‍ അതിലുണ്ടാകണം. ഈ സമിതി മൂന്നുമാസത്തിലൊരിക്കല്‍ യോഗം ചേര്‍ന്നു സ്ഥിതിഗതികള്‍ വിലയിരുത്തണം. ഇതൊക്കെയാണു വ്യവസ്ഥയെങ്കിലും ഒന്നും നടക്കാറില്ല.
പുഴകളും പുറമ്പോക്കുകളും കൈയേറ്റം ചെയ്യുന്നതു തടയാനായി കഴിഞ്ഞ ജൂലായില്‍ ലാന്‍ഡ് റവന്യൂ കമ്മിഷണര്‍ ഇത്തരം കമ്മിറ്റി രൂപീകരിക്കണമെന്നാവശ്യപ്പെട്ടു ജില്ലാ കലക്ടര്‍മാര്‍ക്ക് ഉത്തരവു നല്‍കിയിട്ടും മിക്ക ജില്ലകളിലും അതു പ്രാവര്‍ത്തികമായില്ലെന്നു ചാലക്കുടി പുഴ സംരക്ഷണ സമിതി സെക്രട്ടറി എസ്.പി രവി പറയുന്നു.