മലപ്പുറം: ഗവ. കോളജിനു പുതുതായി നിര്‍മിച്ച ലൈബ്രറി കെട്ടിടത്തിന്റേയും എം.എസ്.സി ഫിസിക്‌സ്, എം.എ ഹിസ്റ്ററി കോഴ്‌സുകളുടേയും ഇസ്‌ലാമിക് ഹിസ്റ്ററി ഗവേഷണ കേന്ദ്രത്തിന്റെയും ഉദ്ഘാടനം 29ന് രാവിലെ 11.30ന് കോളജ് ഓഡിറ്റോറിയത്തില്‍ നടക്കും.
ലൈബ്രറി കെട്ടിടവും പി.ജി കോഴ്‌സുകളും മന്ത്രി ഡോ. കെ.ടി ജലീലും റിസര്‍ച്ച് സെന്റര്‍ കാലിക്കറ്റ് സര്‍വകലാശാല വൈസ് ചാന്‍സലര്‍ ഡോ. കെ. മുഹമ്മദ് ബഷീറും ഉദ്ഘാടനം ചെയ്യും. പി.ഉബൈദുല്ല എം.എല്‍.എ അധ്യക്ഷനാകും.
ജില്ലയിലെ പഴക്കമേറിയ കോളജ് ലൈബ്രറിയില്‍ അന്‍പതിനായിരത്തിലേറെ പുസ്തകങ്ങളുണ്ട്. അപൂര്‍വ പുസ്തകങ്ങളും റഫറന്‍സ് ഗ്രന്ഥങ്ങളും ഡിജിറ്റല്‍ ലൈബ്രറി സംവിധാനവും ഒരുക്കിയതായി പ്രിന്‍സിപ്പല്‍ ഡോ. കെ. മായ, ഡോ. എസ്. സജ്ഞയകുമാര്‍, പ്രൊഫ. മൊയ്തീന്‍കുട്ടി തോട്ടശ്ശേരി എന്നിവര്‍ വാര്‍ത്താസമ്മേളനത്തില്‍ പറഞ്ഞു.