മാനന്തവാടി : മാനിനെ വേട്ടയാടി ഇറച്ചിയാക്കുന്നതിനിടെ ഒരാള്‍ അറസ്റ്റില്‍. സംഘത്തിലുണ്ടായിരുന്ന നാല് പേര്‍ ഓടി രക്ഷപ്പെട്ടു. മാനന്തവാടി വിമല നഗര്‍ ആലക്കമാറ്റം രാമനെ (43) യാണ് വനം വകുപ്പ് പിടികൂടിയത്. ബുധനാഴ്ച പുലര്‍ച്ചെ അഞ്ച് മണിയോടെയാണ് സംഭവം. തിരുനെല്ലി ആക്കൊല്ലി എസ്റ്റേറ്റിനോട് ചേര്‍ന്ന തേക്കിന്‍കാട്ടിലാണ് വേട്ട നടന്നത്. വനം വകുപ്പ് ജീവനക്കാരുടെ രാത്രികാല പരിശോധനക്കിടെ വെടിയൊച്ച കേട്ടതിനെത്തുടര്‍ന്ന് നടത്തിയ തിരച്ചിലിലാണ് രാമന്‍ പിടിയിലായത്.
സംഭവ സ്ഥലത്ത് ഉണ്ടായിരുന്ന വാഹനവും കസ്റ്റഡിയിലെടുത്തു. സംഘത്തിലുണ്ടായിരുന്ന സുരേഷ് എന്നയാളുടേതാണ് വാഹനമെന്ന് വനം വകുപ്പ് അധികൃതര്‍ പറഞ്ഞു. 50 കിലോ ഇറച്ചി, തോക്ക്, അമ്പും വില്ലും, കത്തി എന്നിവയാണ് പിടികൂടിയത്.