തളിപ്പറമ്പ്: തളിപ്പറമ്പിലെ മെട്രോ ടൂള്‍സ് കവര്‍ച്ചാ ശ്രമത്തില്‍ പങ്കാളിയായ ഒരാള്‍ അറസ്റ്റില്‍. തൃശ്ശൂര്‍ മണ്ണംപറ്റ കോഴില്ലി വീട്ടില്‍ പി.ആര്‍ ഷിബു(47) നെയാണ് തളിപ്പറമ്പ് പ്രിന്‍സിപ്പല്‍ എസ.്‌ഐ കെ. ദിനേശന്‍ അറസ്റ്റുചെയ്തത്.
കഴിഞ്ഞ 19 ന് പുലര്‍ച്ചെ ഒരു മണിയോടെയാണ് ദേശീയപാതയോരത്തെ മെട്രോ മെഷീന്‍ ടൂള്‍സ് എന്ന കടയുടെ ഷട്ടര്‍ തകര്‍ത്ത് മോഷണശ്രമം നടത്തിയത്. കടയുടെ പിന്‍ഭാഗത്തെ ഷട്ടര്‍ തകര്‍ത്ത് നടത്തിയ മോഷണശ്രമം നേരം പുലര്‍ന്നതോടെ ഉപേക്ഷിക്കുകയായിരുന്നു. മോഷ്ടാക്കള്‍ ഷട്ടര്‍ പൊളിക്കുന്ന ദൃശ്യങ്ങള്‍ സി.സി ടി.വി കാമറയില്‍ പതിഞ്ഞിരുന്നു. ഇതുമായി ബന്ധപ്പെട്ട് പൊലിസ് നടത്തിയ അന്വേഷണത്തിലാണ് പ്രതികളെ തിരിച്ചറിഞ്ഞത്. കവര്‍ച്ച നടത്തുന്നതിനുള്ള ഉപകരണങ്ങള്‍ മോഷ്ടിക്കാനാണ് മെട്രൊ ടൂള്‍സിന്റെ ഷട്ടര്‍ തകര്‍ത്തതെന്ന് ഷിബു ചോദ്യം ചെയ്യലില്‍ സമ്മതിച്ചു. കേസില്‍ ഒരാളെക്കൂടി പിടികൂടാനുണ്ട്. കവര്‍ച്ച കേസില്‍ ജയില്‍ ശിക്ഷയനുഭവിച്ച് അടുത്തിടെയാണ് ഷിബുവും സംഘവും പുറത്തിറങ്ങിയത്.
തൃച്ചംബരത്തെ ഡോക്ടറുടെ വീട്ടില്‍ കവര്‍ച്ച നടത്തിയതുള്‍പ്പെടെ നിരവധി മോഷണക്കേസിലെ പ്രതിയാണ് ഷിബു. കഴിഞ്ഞ ദിവസം പറശ്ശിനിക്കടവ് സ്‌കൂളിനു സമീപത്തുവച്ചാണ് ഇയാളെ പിടികൂടിയത്. തെളിവെടുപ്പിനു ശേഷം ഷിബുവിനെ ഉച്ചയോടെ കോടതിയില്‍ ഹാജരാക്കി റിമാന്‍ഡ് ചെയ്തു.