തേങ്ങുന്നുവോ എന്‍ പിതാമഹാ

കരയുന്നുവോ എന്‍ പ്രിയതായ്
തുടിക്കുന്നീ ജീവനായ്
കുരുതികൊടുക്കുന്നുവോ ഈ നിരപരാധിയെ.

പതറില്ല ഞാന്‍ ചോരയ്ക്കു മുന്‍പില്‍
വിതുമ്പില്ല ഞാന്‍ കഠാര കയറുമ്പോള്‍
എന്നാല്‍ നീറുന്നുയെന്‍ മനം
തന്‍ നിണമിതു ചെയ്യുമ്പോള്‍.

അല്ലയോ നിങ്ങള്‍ എന്തിനു ഭയക്കുന്നു
ഞാനീയുലകത്തില്‍ പിറക്കുമ്പോള്‍
എന്തു ഞാന്‍ ചെയ്തു കൊടുംപാപം
ലജ്ജിതരാകാനിടയാക്കിയോ...?

നിന്‍സുതയായി ജനിച്ചതോ
സര്‍വനന്മ കാംക്ഷിച്ചതോ
അതോ പെണ്ണായി പിറന്നതോ?
ചൊല്ലൂ എന്‍ മേലുള്ള കുറ്റം.

കൊതിക്കുന്നു എന്‍ മനം
ഒരു സുതയായ് വാഴാന്‍
സോദരിയായ് സ്‌നേഹം നുകരാന്‍
നിറവേറ്റുകല്ലയോ ഈ കൊച്ചാഗ്രഹങ്ങള്‍...

എന്തിനു താഴ്ത്തുന്നു പെണ്‍സമൂഹത്തെ
ധമനിതന്നെയൊരു നാരിയല്ലോ
നീ പിറന്നതും സ്ത്രീയില്‍ നിന്നല്ലോ
വാത്സല്യം തന്നതും അവള്‍ തന്നെയല്ലേ?

ചെയ്യും ഞാനീയുലകത്തിനായ്
എന്നാലാകുംവിധം ധന്യമായ്
വിജയം വരിക്കും ഞാന്‍ ലോകത്തിന്മേല്‍
അനുവദിക്കൂ എന്നെ പിറക്കാന്‍...

എന്തുനേടി നിങ്ങളീ ഭ്രൂണഹത്യകൊണ്ട്
വരിച്ചോ വിജയം ഭൂമിക്കുമേല്‍
കേഴുന്നു ഇനിയിതു ചെയ്യരുതേ...
സമ്പാദ്യമായി കരുതേണം ബാധ്യതയാകുകില്ലേ...