ചെറുപുഴ: സംസ്ഥാന കായിക മേളയില്‍ പ്രാപ്പൊയില്‍ ഗവ.ഹയര്‍ സെക്കന്‍ഡറി സ്‌കൂള്‍ താരത്തിന് ഡിസ്‌കസ് ത്രോയില്‍ വെള്ളി മെഡല്‍.
സ്‌കൂളിലെ ഒന്‍പതാം ക്ലാസ് വിദ്യാര്‍ഥിനി ചെറുപുഴ പാണ്ടിക്കടവിലെ സി.പി ആവണിയാണ് സംസ്ഥാന കായികമേളയില്‍ വെള്ളി നേടിയത്. സ്‌കൂള്‍ അധ്യാപിക ശ്രീജയുടെയും ഉത്തമന്റെയും മകളാണ്. അടിസ്ഥാന സൗകര്യങ്ങളില്ലാതിരുന്നിട്ടും ജില്ലാ കായിക മേളയില്‍ മികച്ച രണ്ടാമത്തെ സ്‌കൂളായി മാറിയ പ്രാപ്പൊയില്‍ സ്‌കൂളിലെ സി.പി ആവണി സംസ്ഥാന കായികമേളയില്‍ സബ്ജൂനിയര്‍ ഡിസ്‌കസ് ത്രോയിലാണ് വെള്ളിമെഡല്‍ നേടിയത്.
ജില്ലാ മേളയില്‍ മീറ്റ് റെക്കോഡോടെ സ്വര്‍ണം നേടിയ ആവണി (22.33 മീറ്റര്‍) സംസ്ഥാനത്തും നേട്ടം ആവര്‍ത്തിക്കുകയായിരുന്നു. സ്‌പോര്‍ട്‌സ് സ്‌കൂളുകള്‍, സായി, ഉഷ സ്‌കൂള്‍, മെഴ്‌സിക്കുട്ടന്‍ അക്കാദമി, മാര്‍ ബേസില്‍, തുടങ്ങിയ വമ്പന്മാരോട് മത്സരിച്ചാണ് ആവണി ഈ നേട്ടം കരസ്ഥമാക്കിയത്. സ്‌കൂള്‍ കായികാധ്യാപിക സുജയുടെയും കോച്ച് കെ.എസ് മാത്യുവിന്റേയും നേതൃത്വത്തിലായിരുന്നു പരിശീലനം.