സിദ്ധാപുരം: കുടക് ജില്ലയിലെ മൂന്ന് മുനിസിപ്പാലിറ്റികളിലേക്കുള്ള തെരഞ്ഞടുപ്പ് നാളെ നടക്കും. വിരാജ്‌പേട്ട, സോമവാര്‍പേട്ട, കുശാല്‍നഗര്‍ എന്നീ മുനിസിപ്പാലിറ്റികളിലേക്കുള്ള തെരഞ്ഞെടുപ്പാണ് നാളെ നടക്കുന്നത്.
ആകെ 45 സീറ്റുകളിലേക്കായി 145 പേരാണ് മത്സരരംഗത്തുള്ളത്. സോമവാര്‍പേട്ടയിലും വിരാജ്‌പേട്ടയിലും കോണ്‍ഗ്രസും ജെ.ഡി.എസും സഖ്യമായാണ് മത്സരിക്കുന്നത്. എന്നാല്‍ കുശാല്‍നഗറില്‍ ഇരുപാര്‍ട്ടികളും വേറിട്ടാണ് മത്സരിക്കുന്നത്. മൂന്നിടത്തും എല്ലാ സീറ്റുകളിലും ബി.ജെ.പി ഒറ്റക്ക് മത്സരിക്കും.
18 സീറ്റുള്ള വിരാജ്‌പേട്ടയില്‍ 55 പേരാണ് മത്സരരംഗത്തുള്ളത്. ഇവിടെ കോണ്‍ഗ്രസ് 14ലും ജെ.ഡി.എസ് നാലുസീറ്റിലുമായി സഖ്യം ചേര്‍ന്നാണ് മത്സരിക്കുന്നത്. ഒരു സീറ്റില്‍ സി.പി.എമ്മും 18 സ്വതന്ത്രരും രംഗത്തുണ്ട്. സോമവാര്‍പേട്ടയിലെ ആകെയുള്ള 11 സീറ്റുകളിലേക്ക് 26 പേരാണ് മത്സരരംഗത്തുള്ളത്.
കോണ്‍ഗ്രസില്‍നിന്ന് ആറും ജെ.ഡി.എസില്‍നിന്ന് അഞ്ചുപേരുമാണ് സഖ്യമായി മത്സരിക്കുന്നത്. ത്രികോണ മത്സരം നടക്കുന്ന കുശാല്‍നഗര്‍ മുനിസിപ്പാലിറ്റിയില്‍ 16 സീറ്റിലേക്കായി 64 പേരാണ് രംഗത്തുള്ളത്.