ജനകീയ സമരത്തിന്റെ ഉജ്ജ്വലവിജയമെന്ന് ജോയ്‌സ് ജോര്‍ജ് എം പി
ചെറുതോണി: മലയോര ഹൈവേയുടെ നിര്‍മ്മാണത്തിന് സാമ്പത്തിക അനുമതി ലഭിച്ചതായി അഡ്വ. ജോയ്‌സ് ജോര്‍ജ്ജ് എം പി അറിയിച്ചു.
ജനകീയ സമരത്തിന്റെ ഉജ്ജ്വല വിജയമാണ് ഇടതുപക്ഷ സര്‍ക്കാരിന്റെ ഈ തീരുമാനത്തിലൂടെ ഉണ്ടായതെന്നും അദ്ദേഹം പറഞ്ഞു. കുറത്തിക്കുടി ആദിവാസി കോളനിയിലേയ്ക്കുള്ള റോഡ് പൊതുമരാമത്ത് വകുപ്പ് നിര്‍മ്മിച്ചുകൊണ്ടിരിക്കെയാണ് വനം വകുപ്പ് തടസ്സപ്പെടുത്തിയത്. 2011-12 ല്‍ ബജറ്റില്‍ തുക വകയിരുത്തി ടെണ്ടര്‍ നടപടികള്‍ പൂര്‍ത്തീകരിച്ച് ആരംഭിച്ച നിര്‍മ്മാണ പ്രവര്‍ത്തിയാണ് വനം വകുപ്പ് തടഞ്ഞത്. രാത്രിയില്‍ വനം വകുപ്പ് ഉദ്യോഗസ്ഥര്‍ പൊതുമരാമത്ത് വകുപ്പ് നിര്‍മ്മിച്ച കലുങ്കുകള്‍ സ്‌ഫോടക വസ്തുക്കള്‍ ഉപയോഗിച്ച് തകര്‍ത്തിരുന്നു.
വനം വകുപ്പിന്റെ നടപടിയില്‍ പ്രതിഷേധിച്ച് നേര്യമംഗലം ഫോറസ്‌ററ് ഓഫീസിനു മുന്നില്‍ നിരാഹാരസമരം ഉള്‍പ്പടെയുള്ള സമരങ്ങള്‍ നടന്നിരുന്നു. കരാറുകാരന്‍ പണി ഉപേക്ഷിച്ച് പോകുകയും സമരം നടത്തിയ താനുള്‍പ്പടെയുള്ള ജനപ്രതിനിധികള്‍ക്കെതിരെ പൊലിസ് കേസ് ചാര്‍ജ്ജു ചെയ്യുകയും ചെയ്തിരുന്നു.
ഇളംമ്പാശ്ശേരി മുതല്‍ ആവറുകുട്ടി വരെ റോഡ് നിര്‍മ്മിക്കുന്നതിന് 3.5 കോടി രൂപയ്ക്ക് സാമ്പത്തിക അനുമതിയായി ഉത്തരവിറക്കിയിട്ടുളളത്. പൊതുമരാമത്തിന്റെ മലയോര ഹൈവേയുടെ പ്രവര്‍ത്തി പുനഃര്‍നിര്‍ണ്ണയിച്ച് അടിയന്തിരമായി നിര്‍മ്മാണം ആരംഭിക്കുന്നതിനും തീരുമാനമായി. ടെണ്ടര്‍ എടുത്ത ശേഷം കാരണമായി നിര്‍മ്മാണം വൈകിപ്പിച്ച കരാറുകാരനില്‍ നിന്നും നഷ്ടം ഈടാക്കുന്നതിനും സര്‍ക്കാര്‍ തീരുമാനമായിട്ടുണ്ട്.
ആദിവാസിക്കുടിയിലേയ്ക്കുള്ള റോഡ് തടഞ്ഞ് വനം വകുപ്പ് ഉദ്യോഗസ്ഥര്‍ക്ക് ഓശാന പാടിയ മുന്‍ വനം മന്ത്രിക്കും സര്‍ക്കാരിനുമുള്ള രാഷ്ട്രീയ പ്രഹരമാണ് മലയോര ഹൈവേ പുനഃര്‍നിര്‍മ്മിക്കാനുള്ള എല്‍ ഡി എഫ് സര്‍ക്കാരിന്റെ തീരുമാനത്തിലൂടെ ഉണ്ടായിട്ടുള്ളതെന്നും ജോയ്‌സ് ജോര്‍ജ്ജ് എം പി പറഞ്ഞു.