ഒത്തുതീര്‍പ്പിലൂടെ രമണി കേസ് പിന്‍വലിക്കുകയോ കോടതിവിധി അനുസരിച്ചുള്ള ശിക്ഷ അനുഭവിക്കുകയോ ചെയ്താല്‍ മാത്രമേ ബൈജുവിന് രാജ്യം വിടാനാവൂ

അല്‍ഐന്‍: കൃത്രിമരേഖ ചമച്ച് രാജ്യംവിടാന്‍ ശ്രമിച്ച കേസില്‍ വ്യവസായി ഗോകുലം ഗോപാലന്റെ മകന്‍ ബൈജു ഗോപാലന് ക്രിമിനല്‍ കോടതി ഒരു മാസം തടവുശിക്ഷ വിധിച്ചു. ചെക്കു കേസ് നിലനില്‍ക്കുന്നതിനാല്‍ ഇദ്ദേഹത്തിന് ഒരുമാസം കഴിഞ്ഞാലും രാജ്യം വിടാനാവില്ല. ദുബൈയില്‍ ഹെല്‍ത്ത് കെയര്‍ സ്ഥാപനം വാങ്ങിയതുമായി ബന്ധപ്പെട്ട് ചെന്നൈ സ്വദേശി രമണി നല്‍കിയ കരാര്‍ലംഘന കേസിലാണ് ബൈജു യാത്രാവിലക്ക് നേരിടുന്നത്.
രണ്ടു കോടി ദിര്‍ഹമിന്റെ ചെക്ക് മടങ്ങിയെന്നു കാണിച്ചാണ് രമണി പരാതി നല്‍കിയത്. ഈ കേസില്‍നിന്നു രക്ഷപ്പെടാനായി ഓഗസ്റ്റ് 23ന് യു.എ.ഇയില്‍ നിന്ന് റോഡ് മാര്‍ഗം ഒമാനിലേക്കു കടക്കാന്‍ ശ്രമിക്കുമ്പോഴാണ് ചെക്ക്‌പോസ്റ്റില്‍ പിടിയിലായത്. ഒത്തുതീര്‍പ്പിലൂടെ രമണി കേസ് പിന്‍വലിക്കുകയോ കോടതിവിധി അനുസരിച്ചുള്ള ശിക്ഷ അനുഭവിക്കുകയോ ചെയ്താല്‍ മാത്രമേ ബൈജുവിന് രാജ്യംവിടാനാവൂ.
അതേസമയം ചെന്നൈയില്‍ ഹോട്ടല്‍ ഇടപാടില്‍ കബളിപ്പിക്കപ്പെട്ടതിനെതിരേ ഗോകുലം ഗോപാലന്‍ കേസ് നല്‍കിയതിനു പകരംവീട്ടാന്‍ എതിര്‍പക്ഷം ദുബൈയില്‍ കേസ് കൊടുക്കുകയായിരുന്നുവെന്നാണ് ബൈജുവിനോടടുത്ത വൃത്തങ്ങള്‍ പറയുന്നത്.