പാലാ: ഫാക്ടിന്റെ പുനരുദ്ധാരണ പ്രവര്‍ത്തനത്തിനായി ആറ് തവണ കത്തയച്ചിട്ടും സംസ്ഥാന മുഖ്യമന്ത്രി പിണറായി വിജയന്‍ ഒരു മറുപടിക്കത്ത്‌പോലും അയച്ചില്ലെന്ന് കേന്ദ്ര രാസവളം മന്ത്രി സദാനന്ദ ഗൗഡ പറഞ്ഞു.
പാലാ നിയോജക മണ്ഡലം എന്‍.ഡി.എ കണ്‍വന്‍ഷന്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. സംസ്ഥാന മുഖ്യമന്ത്രി ഉദാസീനനാണ്. പ്രകൃതി ദുരന്തത്തില്‍ ഉണ്ടായ നഷ്ടം കേന്ദ്രത്തിനെ ബോധ്യപ്പെടുത്തുന്ന കാര്യത്തില്‍ മുഖ്യമന്ത്രി ഉദാസീനതയാണ് കാണിച്ചത്. ഒരു എം.പി പോലും ഇല്ലെങ്കിലും കേന്ദ്രസര്‍ക്കാര്‍ കേരളത്തോട് വളരെ ഉദാരമായ സമീപനമാണ് കാണിച്ചത്. മാത്രമല്ല, ഫെഡറല്‍ സംവിധാനത്തെ ശക്തിപ്പെടുത്തുന്ന നിലപാടാണ് കേന്ദ്രസര്‍ക്കാരിന്. യു.പി.എ സര്‍ക്കാരിന്റെ കാലത്ത് സംസ്ഥാനങ്ങള്‍ക്ക് നല്‍കിയിരുന്ന വിഹിതം 30 ശതമാനമായിരുന്നു. എന്നാല്‍ നരേന്ദ്രമോദി സര്‍ക്കാര്‍ സംസ്ഥാനങ്ങള്‍ക്ക് 42 ശതമാനം വിഹിതം നല്‍കി. സമഗ്രമായ വികസനമാണ് മോദി സര്‍ക്കാരിന്റെ മുഖമുദ്രയെന്നും അദ്ദേഹം പറഞ്ഞു.
വികസനം മുരടിച്ചു നിന്നിരുന്ന കശ്മിരില്‍ വന്‍ വികസനമാണ് സര്‍ക്കാര്‍ ലക്ഷ്യമിടുന്നത്. ഒരു രാജ്യം, ഒരു ജനത, ഒരു നിയമം, ഒരു തെരഞ്ഞെടുപ്പ് എന്ന ലക്ഷ്യത്തിലേയ്ക്കാണ് രാജ്യം നീങ്ങുന്നതെന്നും പാലായിലെ തെരഞ്ഞെടുപ്പ് കേരളത്തിന് പുതിയ ദിശാബോധം നല്‍കുന്നതാണെന്നും മന്ത്രി പറഞ്ഞു.
എന്‍.ഡി.എ നേതാക്കളായ പി.സിതോമസ്, പി.സി.ജോര്‍ജ് എം.എല്‍.എ, സുഭാഷ് വാസു, എന്‍.കെനീലകണ്ഠന്‍ മാസ്റ്റര്‍, കെ.കെ പൊന്നപ്പന്‍, നോബിള്‍ മാത്യു, പി.കെ കൃഷ്ണദാസ്, റബ്ബര്‍ ബോര്‍ഡ് ചെയര്‍മാന്‍ ഡോ. സാവര്‍ ദനാനിയ, പ്രൊഫ. ബി വിജയകുമാര്‍ എന്നിവര്‍ സംസാരിച്ചു.