ന്യൂഡല്‍ഹി: തന്നെ അറസ്റ്റ് ചെയ്തത് എന്തിനാണെന്ന് തനിക്കിപ്പോഴും അറിയില്ലെന്ന് തിഹാര്‍ ജയിലില്‍ കിടക്കുന്ന മുന്‍ കേന്ദ്രമന്ത്രി പി.ചിദംബരത്തിന്റെ കുറിപ്പ്. ചിദംബരത്തിനു വേണ്ടി അദ്ദേഹത്തെ സന്ദര്‍ശിച്ച കുടുംബമാണ് ട്വീറ്റ് ചെയ്തിരിക്കുന്നത്.
2007 ല്‍ ഐ.എന്‍.എക്‌സ് മീഡിയക്ക് 305 കോടി വിദേശ ഫണ്ട് സ്വീകരിക്കാന്‍ അനുമതി നല്‍കിയ ഫോറിന്‍ ഇന്‍വെസ്റ്റ്‌മെന്റ് പ്രമോഷന്‍ ബോഡിലെ ഒരു ഉദ്യോഗസ്ഥനെയും അറസ്റ്റ് ചെയ്തിട്ടില്ല. പകരം അതേ കുറ്റത്തിന് എന്നെ അറസ്റ്റ് ചെയ്തിരിക്കുന്നു. ഉദ്യോഗസ്ഥര്‍ ഒറ്റക്കെട്ടായി ചെയ്ത ശുപാര്‍ശയില്‍ അവസാനമായി ഒപ്പുവച്ചു എന്ന കാരണത്താലാണോ താന്‍ ജയിലില്‍ കിടക്കുന്നതെന്ന് ചിദംബരം ചോദിച്ചു.
ഒരു ഡസന്‍ ഉദ്യോഗസ്ഥര്‍ ചേര്‍ന്നല്ലേ ഇക്കാര്യത്തിനായി ശുപാര്‍ശ നല്‍കിയത്, പിന്നെയെങ്ങിനെ അതിന് അംഗീകാരം നല്‍കുക മാത്രം ചെയ്ത താങ്കള്‍ മാത്രമായി അറസ്റ്റിലായത് എന്ന് ആളുകള്‍ എന്നോട് ചോദിക്കുന്നു.
എനിക്ക് മറുപടിയില്ല. ഒരു ഉദ്യോഗസ്ഥനും തെറ്റായി ഒന്നും ചെയ്തിട്ടില്ല. അവരെ അറസ്റ്റ് ചെയ്യേണ്ട കാര്യമില്ലെന്നും ചിദംബരം പറഞ്ഞു. ഐ.എന്‍.എക്‌സ് മീഡിയ കേസില്‍ ആഗസ്ത് 21 ന് സി.ബി.ഐ അറസ്റ്റ് ചെയ്ത ചിദംബരത്തെ ഈ മാസം 19 വരെയാണ് ജുഡീഷ്യല്‍ കസ്റ്റഡിയില്‍ തിഹാര്‍ ജയിലിലടച്ചത്.