മനാമ: സമസ്ത ബഹ്‌റൈന്‍ കേന്ദ്രകമ്മിറ്റി പ്രസിഡന്റായി പ്രമുഖ പണ്ഡിതന്‍ സയ്യിദ് ഫഖ്‌റുദ്ദീന്‍ കോയ തങ്ങള്‍ തേങ്ങാപട്ടണം തുടരും. കഴിഞ്ഞ ദിവസം മനാമ ഗോള്‍ഡ് സിറ്റിയിലെ സമസ്ത ബഹ്‌റൈന്‍ ഓഡിറ്റോറിയത്തില്‍ നടന്ന ജനറല്‍ ബോഡിയോഗത്തിലാണ് ഭാരവാഹികളെ തെരഞ്ഞെടുത്തത്. കഴിഞ്ഞ മൂന്നര പതിറ്റാണ്ടിലേറെയായി ബഹ്‌റൈനിലെ മത സാമൂഹിക സാംസ്‌കാരിക പ്രബോധന മേഖലകളിലെ നിറസാന്നിധ്യവും ബഹുഭാഷാ പണ്ഡിതനുമായ സയ്യിദ് ഫഖ്‌റുദ്ദീന്‍ കോയ തങ്ങള്‍ 2013 നവംബര്‍ മുതല്‍ സമസ്ത ബഹ്‌റൈന്‍ ഘടകത്തിന്റെ പ്രസിഡന്റാണ്.
പാലക്കാട് ജില്ലയിലെ എറവക്കാട് സ്വദേശിയും സാമൂഹിക പ്രവര്‍ത്തകനുമായ വി.കെ കുഞ്ഞഹമ്മദ് ഹാജിയാണ് പുതുതായി തെരഞ്ഞെടുക്കപ്പെട്ട ജന.സെക്രട്ടറി. നേരത്തെ ജന.സെക്രട്ടറിയായിരുന്ന എസ്.എം അബ്ദുല്‍ വാഹിദ് ട്രഷററായും ജോ.സെക്രട്ടറിയായിരുന്ന അശ്‌റഫ് കാട്ടില്‍ പീടിക ഓര്‍ഗനൈസിങ് സെക്രട്ടറിയായും തുടരും.
മറ്റു ഭാരവാഹികള്‍:സയ്യിദ് മുഹമ്മദ് ജിഫ്‌രി തങ്ങള്‍, എടവണ്ണപ്പാറ മുഹമ്മദ് മുസ്‌ലിയാര്‍, സൈദ് മുഹമ്മദ് വഹബി, ബഷീര്‍ അരൂര്‍ (വൈസ് പ്രസിഡന്റുമാര്‍). ഖാസിം റഹ്മാനി, ശഹീര്‍ കാട്ടാമ്പള്ളി, ശറഫുദ്ദീന്‍ മാരായമംഗലം, മുഹമ്മദ് ശാഫി വേളം (ജോ.സെക്രട്ടറിമാര്‍).
ജനറല്‍ ബോഡി യോഗത്തില്‍ സയ്യിദ് ഫഖ്‌റുദ്ദീന്‍ കോയ തങ്ങള്‍ അധ്യക്ഷനായി. സി.കെ അബ്ദുറഹ്മാന്‍ റിട്ടേണിങ് ഓഫിസറായിരുന്നു. ഉസ്താദ് മുസ്തഫ ഹുദവി ആക്കോട് ഉദ്‌ബോധന പ്രഭാഷണം നടത്തി. ശഹീര്‍ കാട്ടാമ്പള്ളി സ്വാഗതവും ഖാസിം റഹ്മാനി നന്ദിയും പറഞ്ഞു.