ധാക്ക: മഴയുടെ ചെറുത്തുനില്‍പ്പിനെ അതിജീവിച്ച് ബംഗ്ലാദേശിനെതിരേ ജയിച്ചപ്പോള്‍ ക്യാപ്റ്റന്‍ റാഷിദ് ഖാനെ തേടിയെത്തിയത് മറ്റൊരു റെക്കോര്‍ഡ് കൂടി. ടെസ്റ്റ് വിജയം സ്വന്തമാക്കുന്ന ഏറ്റവും പ്രായം കുറഞ്ഞ ക്യാപ്റ്റനെന്ന റെക്കോര്‍ഡാണ് റാഷിദ് ഖാന്‍ സ്വന്തമാക്കിയത്. അവരുടെ ടെസ്റ്റ് ക്രിക്കറ്റ് ചരിത്രത്തിലെ രണ്ടാം ജയമായിരുന്നു ഇത്. റഷിദ് ഖാന്റെ ഓള്‍ റൗണ്ട് പ്രകടനത്തിന്റെ പിന്‍ബലത്തില്‍ ബംഗ്ലാദേശിനെതിരായ ഏക ടെസ്റ്റില്‍ 224 റണ്‍സിന്റെ വമ്പന്‍ ജയമാണ് അഫ്ഗാന്‍ നേടിയത്. അഫ്ഗാന്റെ മൂന്നാമത്തെ മാത്രം ടെസ്റ്റ് മത്സരമാണിത്. ജയത്തോടെ ടെസ്റ്റില്‍നിന്ന് വിരമിക്കുന്ന മുഹമ്മദ് നബിക്ക് നല്ലൊരു യാത്രയയപ്പ് നല്‍കാനും ടീമിന് സാധിച്ചു.
രണ്ട് ഇന്നിങ്‌സിലുമായി 11 വിക്കറ്റ് വീഴ്ത്തുകയും ഒരു അര്‍ധ സെഞ്ചുറി നേടുകയും ചെയ്ത ക്യാപ്റ്റന്‍ റാഷിദ് ഖാനാണ് കളിയിലെ താരം. സ്‌കോര്‍: അഫ്ഗാന്‍ 342, 260. ബംഗ്ലാദേശ് 205, 173.
ജയിക്കാന്‍ 398 റണ്‍സ് വേണമെന്നിരിക്കെ അവസാന ദിനം ആറിന് 136 റണ്‍സെന്ന നിലയില്‍ ബാറ്റിങ്ങിനിറങ്ങിയ ബംഗ്ലാദേശ് 173 റണ്‍സിന് ഓള്‍ഔട്ടായി. ആറു വിക്കറ്റെടുത്ത റാഷിദ് ഖാനും മൂന്നു വിക്കറ്റെടുത്ത സാഹിര്‍ ഖാനും ചേര്‍ന്നാണ് രണ്ടാം ഇന്നിങ്‌സില്‍ ബംഗ്ലാദേശിനെ തകര്‍ത്തത്.
പരാജയത്തോടെ ടെസ്റ്റ് കളിക്കുന്ന പത്ത് രാജ്യങ്ങള്‍ക്കെതിരേയും തോല്‍ക്കുന്ന ആദ്യ ടീമായി ബംഗ്ലാദേശ് മാറി