ഗോവ: ഐ.എസ്.എല്‍ പോരാട്ടത്തില്‍ പൂനെ സിറ്റി എഫ്.സിയെ രണ്ടിനെതിരേ നാല് ഗോളുകള്‍ക്ക് തകര്‍ത്ത് എഫ്.സി ഗോവ വിജയക്കുതിപ്പ് തുടരുന്നു. സീസണിലെ ഏറ്റവും വാശിയേറിയ പോരാട്ടമായിരുന്നു ഇന്നലെ ഗോവയിലെ ജവഹര്‍ലാല്‍ നെഹ്‌റു സ്റ്റേഡിയത്തില്‍ നടന്നത്.
മത്സരത്തിലെ ആറ് ഗോളുകളും പിറന്നത് ആദ്യ പകുതിയിലാണ്. അഞ്ചാം മിനുട്ടില്‍ ഫെറാന്‍ കൊറോമിനസാണ് ഗോവന്‍ ഗോള്‍വേട്ടക്ക് തുടക്കമിട്ടത്. എട്ടാം മിനുട്ടില്‍ മാഴ്‌സെലോ പെരേരയിലൂടെ പൂനെ ഒരു ഗോള്‍ മടക്കി. 12ാം മിനുട്ടില്‍ ഹ്യൂഗോ ബൗമസിലൂടെയും 20ാം മിനുട്ടില്‍ ജാക്കിചന്ദ് സിങിലൂടെയും ഗോള്‍ നേടി ഗോവ ലീഡ് ഇരട്ടിയാക്കി.
23ാം മിനുട്ടില്‍ അല്‍ഫാരോ പൂനെക്ക് വേണ്ടി ഒരു ഗോള്‍ മടക്കിയെങ്കിലും 35ാം മിനുട്ടില്‍ ഫൊറാന്‍ കൊറോമിനസ് ഒരു ഗോള്‍ കൂടി നേടി ഗോവയുടെ വിജയം ഉറപ്പിച്ചു. ജയത്തോടെ നോര്‍ത്ത്ഈസ്റ്റ് യുനൈറ്റഡിനെ പിന്തള്ളി ഗോവ പട്ടികയില്‍ ഒന്നാംസ്ഥാനത്തേക്ക് കയറി. സീസണില്‍ ഒരു മത്സരം പോലും ജയിക്കാനാവാതെ പൂനെ പട്ടികയില്‍ അവസാന സ്ഥാനത്താണ്.