ജിദ്ദ: വിശുദ്ധ കഅ്ബാലയത്തെ അണിയിച്ച കിസ്‌വ താഴ്ത്തിക്കെട്ടി. കിംഗ് അബ്ദുല്‍ അസീസ് കിസ്‌വ നിര്‍മാണ കോംപ്ലക്‌സില്‍ നിന്നുള്ള 46 വിദഗ്ധരും സാങ്കേതിക ജീവനക്കാരും ചേര്‍ന്ന് ചൊവ്വാഴ്ച രാത്രിയാണ് കിസ്‌വ താഴത്തിക്കെട്ടിയത്. ഹാജിമാരുടെ കടുത്ത തിരക്ക് അനുഭവപ്പെടുന്ന ഹജ് കാലത്ത് കിസ്‌വ ഉയര്‍ത്തിക്കെട്ടുന്നത് പതിവാണ്. ദുല്‍ഹജ് ഒമ്പതിന് അറഫ ദിനത്തില്‍ വിശുദ്ധ കഅ്ബാലയത്തെ പുതിയ കിസ്‌വ അണിച്ചിരുന്നു.

പഴയ കിസ്‌വ അഴിച്ചുമാറ്റി പുതിയ പുടവ അണിയിച്ചപ്പോഴും കിസ്‌വ ഉയര്‍ത്തിക്കെട്ടുകയായിരുന്നു. കടുത്ത തിരക്കില്‍ കേടായിപ്പോകാതെ നോക്കുന്നതിനും വൃത്തികേടാകാതെ സൂക്ഷിക്കുന്നതിനും ദുല്‍ഖഅ്ദ മധ്യത്തില്‍ മൂന്നു മീറ്റര്‍ ഉയരത്തിലാണ് കിസ്‌വ ഉയര്‍ത്തിക്കെട്ടിയതെന്ന് കിംഗ് അബ്ദുല്‍ അസീസ് കിസ്വ കോംപ്ലക്‌സ് ഡയറക്ടര്‍ ജനറല്‍ ഹിശാം ബിന്‍ സുലൈമാന്‍ അലാവുദ്ദീന്‍ പറഞ്ഞു.