തുറവൂര്‍: ദേശീയപാതയിലെ തുറവൂര്‍ കവലയിലെ ഹൈമാസ്റ്റ് വിളക്ക് രണ്ടാഴ്ചയായി തെളിയുന്നില്ല. ജനത്തിരക്കേറിയ കവലയായതിനാല്‍ അപകടങ്ങള്‍ തുടര്‍കഥയാണ്.
മാസങ്ങള്‍ക്ക് മുമ്പ് കെ.സി.വേണുഗോപാല്‍ എം.പി.യുടെ പ്രാദേശിക വികസന ഫണ്ടില്‍ നിന്നും അനുവദിച്ച തുക ഉപയോഗിച്ച് വിളക്ക് സ്ഥാപിച്ചത്. എന്നാല്‍ തകരാറിലായതോടെ രണ്ടാഴ്ചയായി കവല ഇരുട്ടിലായി. ഏറെ പ്രയാസപ്പെട്ടാണ് യാത്രക്കാര്‍ റോഡ് മുറിച്ചു കടക്കുന്നത്. വിളക്കുകള്‍ സ്ഥാപിക്കാനല്ലാതെ അറ്റകുറ്റപ്പണികള്‍ക്കായി ഫണ്ടില്ലാത്തതാണ് പ്രതിസന്ധിക്ക് കാരണം. തുറവൂര്‍ പഞ്ചായത്തിന്റെ പരിധിയിലെ മീഡിയനിലാണ് വിളക്ക് സ്ഥിതി ചെയ്യുന്നത്. അറ്റകുറ്റപ്പണി നടത്താന്‍ ആവശ്യമായ നടപടി സ്വീകരിക്കാന്‍ ബന്ധപ്പെട്ടവര്‍ തയാറാകണമെന്നാണ് ജനകീയാവശ്യം.