കായംകുളം: 2000 രൂപയുടെ നോട്ടിന്റെ ഫോട്ടോസ്റ്റാറ്റ് എടുത്ത് നാടോടി കച്ചവടക്കാരെ കബളിപ്പിച്ച യുവാവ് അറസ്റ്റില്‍. ഓലകെട്ടിയമ്പലം പുളിമൂട്ടില്‍ അനു വര്‍ഗീസ് (31)നെയാണ് പൊലിസ് അറസ്റ്റ് ചെയ്തത്.
രണ്ട് ദിവസം മുന്‍പ് കൃഷ്ണപുരത്ത് ദേശീയപാതയോരത്ത് ബലൂണ്‍ കച്ചവടം നടത്തുന്ന രാജസ്ഥാന്‍ സ്വദേശിയായ കച്ചവടക്കാരനാണ് ഇയാളുടെ തട്ടിപ്പില്‍ കുടുങ്ങിയത്.
കഴിഞ്ഞ ദിവസം ഇയാള്‍ രണ്ടായിരത്തിന്റെ ഫോട്ടോസ്റ്റാറ്റ് നോട്ട് നല്‍കി നൂറു രൂപയുടെ ബലൂണ്‍ വാങ്ങി. കച്ചവടക്കാരന്‍ ബാക്കി പണം നല്‍കുകയും ചെയ്തു. കച്ചവടക്കാരന്‍ പിന്നീട് ഈ നോട്ടുമായി സമീപത്തുള്ള മറ്റൊരു കച്ചവടക്കാന്റ അടുത്ത് ചില്ലറ മാറാന്‍ എത്തിയപ്പോഴാണ് തട്ടിപ്പ് മനസിലായത്.
ഇന്നലെ വീണ്ടും രണ്ടായിരത്തിന്റെ നോട്ടുമായി ഇയാള്‍ ബലൂണ്‍ വാങ്ങാന്‍ കച്ചവടക്കാരന്റെ അടുത്തെത്തി. സമീപത്തുള്ള കച്ചവടക്കാര്‍ ചേര്‍ന്ന് ഇയാളെ തടഞ്ഞു നിറുത്തി പൊലിസില്‍ ഏല്‍പ്പിക്കുകയായിരുന്നു. ഇയാളുടെ വീട്ടില്‍ പരിശോധന നടത്തിയ പൊലിസ് എതാനും 2000, 500, 200 രൂപാ നോട്ടുകളുടെ ഫോട്ടോസ്റ്റാറ്റും നോട്ടടിക്കാനുപയോഗിച്ച സ്‌കാനറും പിടിച്ചെടുത്തു. ഇരു പുറവും ഫോട്ടോസ്റ്റാറ്റ് എടുത്തശേഷം കത്രിക കൊണ്ട് മുറിച്ചെടുത്താണ് വ്യാജ നോട്ട് ഉണ്ടാക്കിയത്.
ഇത് ഒറ്റ നോട്ടത്തില്‍ തന്നെ തിരിച്ചറിയാന്‍ കഴിയുമെന്നും പൊലിസ് പറഞ്ഞു.
കഴിഞ്ഞ ആഴ്ചയാണ് ഇയാള്‍ അബുദാബിയില്‍ നിന്നും അവധിയ്ക്ക് നാട്ടിലെത്തിയത്. സി.ഐ കെ.സദന്‍,എസ്.ഐ എ. സുരേഷ് കുമാര്‍ എന്നിവരുടെ നേതൃത്വത്തിലുള്ള പൊലിസ് സംഘമാണ് അറസ്റ്റ് ചെയ്തത്.