ചെന്നൈ ; ആഭ്യന്തര മന്ത്രി അമിത് ഷായുടെ ഒരു രാജ്യം ഒരു ഭാഷ ആഹ്വാനത്തിനെതിരെ ശക്തമായ പ്രതിഷേധവുമായി തമിഴ് ജനത. ആഭ്യന്തര മന്ത്രിയുടെ പ്രഖ്യാപനം വന്നയുടനെ വ്യത്യസ്ത റയില്‍വേസ്റ്റേഷനുകളിലെ സൂചന ബോര്‍ഡുകളിലെ ഹിന്ദി എഴുത്തുകുളാണ് വ്യാപകമായി മായ്ച്ചത്. വരും ദിവസങ്ങളില്‍ ശക്തമായ പ്രക്ഷോഭങ്ങള്‍ ഉണ്ടാവുമെന്നാണ് സൂചനകള്‍. ശക്തമായ ഹിന്ദി വിരുദ്ധ വികാരം ഉയര്‍ത്തിപ്പിടിക്കുന്ന സംസ്ഥാനമാണ് തമിഴ്‌നാട്.

അമിത് ഷായുടെ പ്രസ്ഥാവനക്കെതിരെ സ്റ്റാലിന്‍ രംഗത്ത് വന്നു.ഹിന്ദി അടിച്ചേല്‍പ്പിക്കാനുള്ള ശ്രമങ്ങള്‍ ഞങ്ങള്‍ നിരന്തരം എതിര്‍ത്തുക്കൊണ്ടിരിക്കുമെന്ന് ഡി.എം.കെ നേതാവ് എം.കെ സ്റ്റാലിന്‍ പറഞ്ഞു. അമിത് ഷായുടെ ഇന്നത്തെ പ്രസ്താവന ഞെട്ടലുണ്ടാക്കുന്നതാണ്. രാജ്യത്തിന്റെ ഐക്യത്തെ അത് ബാധിക്കും. അദ്ദേഹം തന്റെ പ്രസ്താവന പിന്‍വലിക്കണം. പാര്‍ട്ടി നിര്‍വാഹക സമിതി ചേര്‍ന്ന് വിഷയം ഗൗരവമായി ചര്‍ച്ച ചെയ്യുമെന്നും സ്റ്റാന്‍ലിന്‍ പറഞ്ഞു.