ഛണ്ഡിഗഡ്: മയക്കുമരുന്ന് വേട്ടയില്‍ വിദഗ്ധനായ പഞ്ചാബ് പൊലിസ് ഉദ്യോഗസ്ഥന്‍ മയക്കുമരുന്ന് കേസില്‍ അറസ്റ്റില്‍.  മുതിര്‍ന്ന പൊലിസ് ഉദ്യോഗസ്ഥനായ ഇന്ദ്രജിത്ത് സിങ്ങാണ് അറസ്റ്റിലായത്.

ഇയാളുടെ വീട്ടില്‍ സ്‌പെഷ്യല്‍ ടാസ്‌ക് ഫോഴ്‌സ് നടത്തിയ പരിശോധനയില്‍ മൂന്ന് കിലോ സ്മാക്, നാല് കിലോ ഹെറോയിന്‍ എന്നിവക്കു പുറമേ ആയുധങ്ങള്‍, പണം എന്നിവയും പിടിച്ചെടുത്തു.

ഇറ്റാലിയന്‍ നിര്‍മിത തോക്കുകള്‍, എകെ 47 തോക്ക്, 400 തിരകള്‍, 16 ലക്ഷം രൂപ എന്നിവയാണ് പൊലിസ് പിടിച്ചെടുത്തത്. കപൂര്‍ത്തലിലെ കുറ്റാന്വേഷണ ഏജന്‍സിയുടെ ചുമതല വഹിച്ചുവരികയായിരുന്നു ഇന്ദ്രജിത്ത് സിങ്.

കഴിഞ്ഞ അഞ്ച് വര്‍ഷക്കാലത്തെ മയക്കുമരുന്ന് വേട്ട സംബന്ധിച്ച് പരിശോധന നടത്തിയതില്‍ നിന്നാണ് കേസുകളില്‍ ഇന്ദ്രജിത്ത് സിങ്ങിന്റെ പങ്ക് സംബന്ധിച്ച് ഉദ്യോഗസ്ഥര്‍ക്ക് തെളിവുകള്‍ ലഭിക്കുന്നത്. 2013- 14 കാലത്ത് ഇന്ദ്രജിത്ത് വലിയ അളവില്‍ മയക്കുമരുന്നുകള്‍ പിടിച്ചെടുത്തിരുന്നു. എന്നാല്‍ കേസുകള്‍ സ്വയം അന്വേഷിച്ച പഴുതുകള്‍ ചൂണ്ടിക്കാട്ടി മിക്ക പ്രതികളെയും വെറുതെ വിട്ടിരുന്നു.

കോടതിയില്‍ ഹാജരാക്കിയ ഇന്ദ്രജിത്ത് സിങ്ങിനെ ജൂണ്‍ 19 വരെ പൊലിസ് കസ്റ്റഡിയില്‍ വിട്ടു.

അതേസമയം അറസ്റ്റിനു പിന്നില്‍ ഗൂഢാലോചനയാണെന്നാണ് ഇന്ദ്രജിത്തിന്റെ കുടുംബം പറയുന്നത്.