കോഴിക്കോട്: സി.പി.എം ജില്ലാ സെക്രട്ടറി പി. മോഹനനെ വധിക്കാനുള്ള ശ്രമം ആസൂത്രിതമെന്ന് മുഖ്യമന്ത്രി പിണറായി വിജയന്‍. കഴിഞ്ഞ ദിവസം ബോംബേറുണ്ടായ സി.പി.എം ജില്ലാ കമ്മിറ്റി ഓഫിസ് സന്ദര്‍ശിച്ച ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. മുന്‍കൂട്ടി തയാറാക്കിയ പ്ലാന്‍ പ്രകാരമാണ് അക്രമമുണ്ടായത്. രാഷ്ട്രീയ പാര്‍ട്ടികളുടെ ഓഫിസുകള്‍ അക്രമിക്കുന്നത് ഒഴിവാക്കണമെന്നും അദ്ദേഹം പറഞ്ഞു.
നേരത്തെ അക്രമം സംബന്ധിച്ച് ചില സംഭാഷണങ്ങള്‍ നടന്നിരുന്നു. അതില്‍ ഓഫിസുകള്‍ അക്രമിക്കപ്പെടുന്നത് ഒഴിവാക്കണമെന്നത് സംബന്ധിച്ച് വ്യക്തമായ ധാരണയുണ്ടാക്കുകയും ചെയ്തിരുന്നു. എന്നാല്‍ അതിനു ശേഷവും ഓഫിസുകള്‍ക്ക് നേരെ അക്രമമുണ്ടായി .ഏത് കൂട്ടരായാലും ഓഫിസുകള്‍ക്ക് നേരെ അക്രമം നടക്കാന്‍ പാടില്ല. ഗൗരവപരമായ അന്വേഷണമാണ് കേസുമായി ബന്ധപ്പെട് നടക്കുന്നതെന്നും കുറ്റവാളികളെ ഉടന്‍ പിടികൂടാന്‍ കഴിയുമെന്നും സര്‍വകക്ഷിയോഗ തീരുമാനം എല്ലാവരും പിന്തുടരണമെന്നും പിണറായി അഭ്യര്‍ഥിച്ചു.
കുമ്മനം രാജശേഖരന്റെ വാക്ക് ഇപ്പോള്‍ ആരും മുഖവിലക്കെടുക്കാറില്ല. ഡല്‍ഹിയില്‍ യെച്ചൂരിക്ക് നേരെ അക്രമമുണ്ടായപ്പോള്‍ സംഭവം നടന്നിട്ടില്ലെന്നാണ് അദ്ദേഹം പറഞ്ഞത് ഇതിനു ഉദാഹരണമാണെന്നും മുഖ്യമന്ത്രി കൂട്ടിച്ചേര്‍ത്തു. മന്ത്രി ടി.പി രാമകൃഷ്ണന്‍, പി. മോഹനന്‍, കെ.ടി കുഞ്ഞിക്കണ്ണന്‍, കെ.കെ ലതിക, കെ. ചന്ദ്രന്‍ മാസ്റ്റര്‍, എം. മെഹബൂബ് എന്നിവരും മുഖ്യമന്ത്രിക്കൊപ്പമുണ്ടായിരുന്നു.