ഡബ്ലിന്‍: ത്രിരാഷ്ട്ര ടി20 പരമ്പരയിലെ നെതര്‍ലാന്റ്‌സിനെതിരായ മത്സരത്തില്‍ വെടിക്കെട്ട് ബാറ്റിങ്ങിലൂടെ ഒരുപിടി റെക്കേര്‍ഡുകള്‍ സ്വന്തമാക്കി സ്‌കോട്ടിഷ് താരം ജോര്‍ജ് മുന്‍സി. 41 പന്തില്‍ തന്റെ കന്നി സെഞ്ചുറി കുറിച്ചതോടെ ടി20 ക്രിക്കറ്റില്‍ അതിവേഗ സെഞ്ചുറി നേടുന്ന നാലാമത്തെ താരമെന്ന റെക്കോര്‍ഡാണ് താരം സ്വന്തമാക്കിയത്. ഡേവിഡ് മില്ലര്‍ (35), രോഹിത് ശര്‍മ (35), വിക്രമസേന (35) എന്നിവരാണ് അതിവേഗ സെഞ്ചുറിയുടെ റെക്കോര്‍ഡില്‍ മുന്നിലുള്ളത്. മത്സരത്തില്‍ 56 പന്തില്‍ അഞ്ച് ഫോറും 14 സിക്‌സറും സഹിതം താരം 127 റണ്‍സെടുത്ത് പുറത്താവാതെ നിന്നു. 

ഇതോടൊപ്പം ആദ്യ വിക്കറ്റില്‍ നായകന്‍ കെയ്ല്‍ കോയറ്റ്‌സറോടൊപ്പം (89) കുറിച്ച 200 റണ്‍സും ചരിത്രത്തിന്റെ ഭാഗമായി. ടി20 ഫോര്‍മാറ്റില്‍ മൂന്നാമത്തെ ഉയര്‍ന്ന സ്‌കോറാണ് ഇരുവരും ചേര്‍ന്ന് നേടിയെടുത്തത്. ഈ ഇന്നിങ്‌സില്‍ താരം കുറിച്ച 14 സിക്‌സറുകളും ചരിത്രത്തിന്റെ ഭാഗമായി. 16 സിക്‌സറുകള്‍ കുറിച്ച അഫ്ഗാന്‍ താരം ഹസ്രത്തുള്ള സസായിയാണ് ഇക്കാര്യത്തില്‍ മുമ്പന്‍.

കൂടാതെ ഒരു ടി20യിലെ ഒരോവറില്‍ ഏറ്റവും കൂടുതല്‍ റണ്‍സ് നേടുന്ന രണ്ടാമത്തെ താരമായി മുന്‍സി മാറി. മുന്‍പ് യുവരാജ് സിങ് നേടിയ ആറ് പന്തില്‍ ആറ് സിക്‌സുകള്‍ എന്ന നേട്ടം മറികടക്കാന്‍ താരത്തിനായില്ല. ഡച്ച് ബൗളര്‍ മാക്‌സ് ഒ ഡൗഡിന്റെ ആദ്യ ഓവര്‍ തന്നെ നാലു സിക്‌സറും രണ്ട് ഫോറും പറത്തിയാണ് താരം റണ്‍സ് വാരിക്കൂട്ടിയത്. മത്സരത്തില്‍ 58 റണ്‍സിനാണ് സ്‌കോട്ടിഷ് പട ജയിച്ചുകയറിയത്. ആദ്യം ബാറ്റു ചെയ്ത സ്‌കോട്ട്‌ലന്‍ഡ് മൂന്നു വിക്കറ്റിന് 252 റണ്‍സെടുത്തപ്പോള്‍ കൂറ്റന്‍ വിജയലക്ഷ്യത്തിലേക്ക് ബാറ്റേന്തിയ ഡച്ച് ടീമിന്റെ പോരാട്ടം ഏഴിന് 194 റണ്‍സിലൊതുങ്ങി.