പൊന്നാനി: പൊന്നാനി ഡയാലിസിസ് സെന്റര്‍ പരിസരം ശുചീകരിക്കാന്‍ വിദ്യാര്‍ഥികള്‍ രംഗത്തിറങ്ങി. പൊന്നാനി എം.ഐ ഹയര്‍ സെക്കന്‍ഡറി സ്‌കൂളിലെ റെഡ് ക്രോസ് വളണ്ടിയര്‍മാരാണ് സേവന പ്രവര്‍ത്തനവുമായി രംഗത്തിറങ്ങിയത്.
വൃക്കരോഗം മൂലം ദുരിതമനുഭവിക്കുന്ന രോഗികളെ സന്ദര്‍ശിക്കാനെത്തിയ ജൂനിയര്‍ റെഡ്‌ക്രോസ് വളണ്ടിയര്‍മാരാണ് സേവന പ്രവര്‍ത്തനങ്ങള്‍ നടത്തിയത്. ഡയാലിസിസ് സെന്റര്‍ പരിസരത്തെ കാടുമൂടിയ ഭാഗങ്ങള്‍ വൃത്തിയാക്കി. നഗരസഭാ ചെയര്‍മാനോടൊപ്പമാണ് വിദ്യാര്‍ഥികള്‍ രോഗികളെ സന്ദര്‍ശിച്ചത്. തുടര്‍ന്ന് ഡയാലിസിസിന്റെ പ്രാധാന്യത്തെക്കുറിച്ച് ചെയര്‍മാന്‍ സി പി മുഹമ്മദ് കുഞ്ഞി വിദ്യാര്‍ഥികള്‍ക്ക് വിവരണം നല്‍കി. ഡയാലിസിസ് സെന്റര്‍ കോര്‍ഡിനേറ്റര്‍ കെ മുഹമ്മദ് കുട്ടി മാസ്റ്റര്‍, അധ്യാപകരായ ഉബൈദുല്ല, പി.ബി സുനില്‍കുമാര്‍, എം വിനോദ് നേതൃത്വം നല്‍കി.