കോഴിക്കോട്: കേരള ഭാഷാ ഇന്‍സ്റ്റിറ്റ്യൂട്ട് കോഴിക്കോട് പ്രാദേശിക കേന്ദ്രത്തിന്റെ നേതൃത്വത്തില്‍ സംഘടിപ്പിക്കുന്ന പുസ്തകോത്സവത്തിനു കോഴിക്കോട് പൊലിസ് ക്ലബില്‍ തുടക്കമായി. സാഹിത്യകാരന്‍ സുഭാഷ് ചന്ദ്രന്‍ ഉദ്ഘാടനം ചെയ്തു.
വാക്കുകളുടെ സൗന്ദര്യത്തെ പുതുതലമുറയിലെ കുട്ടികളെ ബോധ്യപ്പെടുത്തേണ്ടത് അനിവാര്യതയാണെന്ന് അദ്ദേഹം അഭിപ്രായപ്പെട്ടു. കുട്ടികള്‍ക്ക് മനസിലാകുന്ന വിധത്തില്‍ എഴുതാനാണ് ഏറ്റവും പ്രയാസം. മനുഷ്യന്‍ കേവലം കായികതയ്ക്കപ്പുറം ആത്മീയവും മാനസികവുമായ പ്രതിഭാസമാണെന്നു നാം തിരിച്ചറിയണമെന്ന് അദ്ദേഹം കൂട്ടിച്ചേര്‍ത്തു. ഭാഷാ ഇന്‍സ്റ്റിറ്റ്യൂട്ട് ഡയരക്ടര്‍ പ്രൊഫ. വി. കാര്‍ത്തികേയന്‍ നായര്‍ അധ്യക്ഷനായി.
മാധ്യമപ്രവര്‍ത്തക ശ്രുതി സുബ്രഹ്മണ്യന്‍ രചിച്ച 'റോബോട്ട്, ഭാവനയുടെ ശാസ്ത്രചരിത്രം' പുസ്തകം കവി പി.കെ ഗോപി പ്രകാശനം ചെയ്തു. ഐ.എസ്.ആര്‍.ഒ മുന്‍ ഡയരക്ടര്‍ ഇ.കെ കുട്ടി പുസ്തകം ഏറ്റുവാങ്ങി. പ്രൊഫ. കെ. ശ്രീധരന്റെ 'ബയോഗ്യാസ്; പ്രസക്തിയും പ്രയോഗവും' പുസ്തകം ഡോ. എ. അച്യുതനു നല്‍കി സുഭാഷ് ചന്ദ്രന്‍ പ്രകാശനം ചെയ്തു. ഭാഷാ ഇന്‍സ്റ്റിറ്റ്യൂട്ട് എഡിറ്റോറിയല്‍ അസിസ്റ്റന്റ് എം.പി ബീന പുസ്തകവിവരണം നടത്തി. ഉപന്യാസ മത്സരവിജയികളായ വിദ്യാര്‍ഥികള്‍ക്കുള്ള സമ്മാനവിതരണം പ്രൊഫ. വി. കാര്‍ത്തികേയന്‍ നായര്‍ നിര്‍വഹിച്ചു. സി.ജെ കുട്ടപ്പന്‍, കെ.വി ബാബുരാജ്, ശ്രുതി സുബ്രഹ്മണ്യന്‍, പ്രൊഫ. കെ. ശ്രീധരന്‍, വി.ബി ഷിബിത്ത് സംസാരിച്ചു. അസി. ഡയരക്ടര്‍ എന്‍. ജയകൃഷ്ണന്‍ സ്വാഗതവും വി.ബിഷിബിത്ത് നന്ദിയും പറഞ്ഞു. പുസ്തകോത്സവം ഏഴിന് സമാപിക്കും.