ന്യൂഡല്‍ഹി: രാജ്യത്ത് സുരക്ഷാ സംവിധാനങ്ങളില്ലാതെ താഴ്ന്ന ജാതിക്കാര്‍ തോട്ടിപ്പണി ചെയ്യേണ്ടിവരികയും മരണപ്പെടുകയും ചെയ്യുന്ന സാഹചര്യത്തില്‍ കേന്ദ്ര സര്‍ക്കാരിനെ രൂക്ഷമായി വിമര്‍ശിച്ച് സുപ്രിം കോടതി.
മറ്റൊരു രാജ്യവും ജനങ്ങളെ ഗ്യാസ് ചേംബറിലേക്കു മരിക്കാനായി വിടാറില്ലെന്നും രാജ്യത്ത് ഓരോ മാസവും കൈകൊണ്ട് തോട്ടിപ്പണി ചെയ്ത് നാലോ അഞ്ചോ പേര്‍ മരിക്കുന്നുണ്ടെന്നും ജസ്റ്റിസ് അരുണ്‍ മിശ്ര അധ്യക്ഷനായ ബെഞ്ച് ചൂണ്ടിക്കാട്ടി.
എസ്.സി-എസ്.ടി നിയമപ്രകാരമുള്ള അറസ്റ്റിനെ ഇളവു ചെയ്യുന്ന കഴിഞ്ഞ വര്‍ഷത്തെ വിധിന്യായത്തെ പുനഃപരിശോധിക്കണമെന്നാവശ്യപ്പെട്ട് കേന്ദ്രം നല്‍കിയ ഹരജിയില്‍ വാദം കേള്‍ക്കവെയാണ് പരമോന്നത കോടതി രാജ്യത്തെ താഴ്ന്ന വിഭാഗങ്ങളുടെ ദുരവസ്ഥ തുറന്നുകാട്ടിയത്.എല്ലാ മനുഷ്യരും തുല്യരാണ്. പക്ഷേ അധികൃതര്‍ തുല്യസൗകര്യം നല്‍കുന്നില്ല. തോട്ടിപ്പണിയിലേര്‍പ്പെട്ടവര്‍ക്കും മാന്‍ഹോളുകള്‍ വൃത്തിയാക്കുന്നവര്‍ക്കും എന്തുകൊണ്ട് മുഖംമൂടിയും ഓക്‌സിജന്‍ സിലിണ്ടറും നല്‍കുന്നില്ലെന്ന് കോടതി കേന്ദ്രത്തിനു വേണ്ടി ഹാജരായ അറ്റോര്‍ണി ജനറല്‍ കെ.കെ വേണുഗോപാലിനോടു ചോദിച്ചു.
ഭരണഘടന രാജ്യത്ത് തൊട്ടുകൂടായ്മ നിര്‍മാര്‍ജനം ചെയ്തിട്ടുണ്ടെങ്കിലും അവര്‍ക്ക് നിങ്ങള്‍ ഹസ്തദാനം ചെയ്യുമോ എന്നു ഞാന്‍ ചോദിക്കുന്നു. ഇല്ല എന്നാണ് ഉത്തരം. ഈ രീതിയിലാണ് നാം മുന്നോട്ടു പോവുന്നത്. സ്വാതന്ത്ര്യം ലഭിച്ച് 70 വര്‍ഷം പിന്നിട്ടിട്ടും ഇത്തരം സംഭവങ്ങള്‍ ഇവിടെ നടക്കുന്നു- ജസ്റ്റിസ് മിശ്ര വികാരാധീനനായി.