എന്‍ഡോസള്‍ഫാന്‍ ദുരിതബാധിത പ്രദേശമെന്നതുകൊണ്ടു തന്നെ നിരവധി രോഗികളാണ് ഇവിടെ ചികിത്സ തേടി എത്തുന്നത്
ബദിയഡുക്ക: വാണിനഗര്‍ പ്രാഥമിക ആരോഗ്യ കേന്ദ്രത്തില്‍ ഡോക്ടര്‍മാരില്ലാത്തതു മൂലം രോഗികള്‍ക്ക് ദുരിതം. എന്‍മകജെ ഗ്രാമപഞ്ചായത്തിലെ വാണിനഗര്‍ പ്രാഥമികാരോഗ്യ കേന്ദ്രമാണ് ഡോക്ടര്‍മാരില്ലാതെ നോക്കുകുത്തിയായി മാറുന്നത്.
എന്‍ഡോസള്‍ഫാന്‍ ദുരിത ബാധിത പ്രദേശമെന്നതുകൊണ്ടുതന്നെ നിരവധി രോഗികളാണ് ഇവിടെ ചികിത്സ തേടി എത്തുന്നത്.
രാവിലെ തന്നെ ആശുപത്രിയിലെത്തുന്ന രോഗികള്‍ ഡോക്ടറുടെ വരവും കാത്ത് ഇരുന്നു മടുക്കുമ്പോള്‍ തിരികെ പോവുകയാണ് പതിവ്.
ആശുപത്രിയില്‍ ഒ.പി വിഭാഗം, ലാബ് എന്നിവ പ്രവര്‍ത്തിക്കുന്നുണ്ടെങ്കിലും ആവശ്യത്തിനുള്ള ജീവനക്കാരോ ഡോക്ടര്‍മാരോ ഇല്ലാത്തതു മൂലം അവയൊന്നും പ്രവര്‍ത്തിക്കുന്നുമില്ല. മാസങ്ങള്‍ക്കുമുന്‍പ് കോഴിക്കോട്ടുനിന്നുള്ള ഒരു ഡോക്ടറെ ഇവിടെ നിയമിച്ചിരുന്നു. എന്നാല്‍ ചാര്‍ജ്ജെടുത്ത് രണ്ടുദിവസം കഴിഞ്ഞ് അവധിയില്‍ പോയതിനുശേഷം തിരികെ എത്തിയില്ലെന്നാണ് രോഗികളുടെ പരാതി.
ഇതിന്റെ അടിസ്ഥാനത്തില്‍ ഉന്നത തല ആരോഗ്യ വകുപ്പ് അധികൃതരുമായി ബന്ധപ്പെട്ടതിനെ തുടര്‍ന്ന് കുമ്പള പ്രാഥമിക ആരോഗ്യ കേന്ദ്രത്തിലെ ഡോക്ടര്‍ക്ക് വാണിനഗര്‍ പ്രാഥമിക ആരോഗ്യ കേന്ദ്രത്തില്‍ അധിക ചുമതല നല്‍കിയിരുന്നു.
ആഴ്ചയില്‍ രണ്ടു ദിവസം ഡോക്ടറുടെ സേവനം ലഭിച്ചിരുന്നുവെന്നാണ് പരിസരവാസികളും രോഗികളും പറയുന്നത്. എന്നാല്‍ കഴിഞ്ഞ ഒരാഴ്ചയായി ഇവിടെ ഡോക്ടറില്ല.
കഴിഞ്ഞ ദിവസം ഡോക്ടറും മറ്റു ജീവനക്കാരുമില്ലാത്തതു മൂലം ആശുപത്രി അടച്ചിടേണ്ട അവസ്ഥയുണ്ടായിട്ടുണ്ടെന്നും രോഗികള്‍ ആരോപിക്കുന്നു. ഡോക്ടര്‍മാരും ജീവനക്കാരും ആശുപത്രിയില്‍ ഡ്യൂട്ടിക്ക് ഹാജരാവത്തത് ഗുരുതരമായ വീഴ്ചയാണെന്നും ഇത് സംബന്ധിച്ച് ആശുപത്രി മാനേജ്‌മെന്റ് കമ്മിറ്റി വിളിച്ചു ചേര്‍ത്ത് ആരോഗ്യ വകുപ്പ് അധികൃതരുമായി ആലോചിച്ച് അടിയന്തിര നടപടികള്‍ സ്വീകരിക്കുമെന്നും എണ്‍മകജെ പഞ്ചായത്ത് പ്രസിഡന്റ് വൈ. ശാരദ പറഞ്ഞു.