റിയാദ്:മൂന്ന് പതിറ്റാണ്ട് കാലത്തെ പ്രവാസ ജീവിതം അവസാനിപ്പിച്ച് റിയാദിലെ സാമൂഹിക പ്രവര്‍ത്തകനും മാസ് റിയാദ് രക്ഷാധികാരിയുമായ മൂസക്കുട്ടി നെല്ലിക്കാപറമ്പ് നാട്ടിലേക്ക് മടങ്ങുന്നു. റിയാദില്‍ 28 വര്‍ഷക്കാലത്തോളമായി ബിസിനസ്സ് രംഗത്ത് പ്രവര്‍ത്തിക്കുകയും ഈ കാലയളവില്‍ നിരവധി സാംസ്‌ക്കാരിക സാമൂഹിക സംഘടനകളില്‍ പ്രവര്‍ത്തിക്കുകയും വിവിധ ഭാരവാഹി സ്ഥാനങ്ങള്‍ കൈകാര്യം ചെയ്യുകയും ചെയ്തു. ഇതുമൂലം വലിയൊരു സുഹൃത്ത് ബന്ധം സൃഷ്ടിച്ചെടുക്കാനും അത് കാത്തു സൂക്ഷിക്കാനും അദ്ധേഹത്തിന് സാധിച്ചു. റിയാദിലും നാട്ടിലുമായി പത്തൊന്‍പത് വര്‍ഷക്കാലത്തോളം സാമൂഹിക ജീവകാരുണ്യ രംഗങ്ങളില്‍ പ്രവര്‍ത്തിച്ച് വരുന്ന മുക്കം പ്രദേശവാസികളുടെ കൂട്ടായ്മയായ ( മാസ് റിയാദ്) എന്ന സംഘടനയുടെ സ്ഥാപക നേതാക്കളിലൊരാളും കുടിയാണ് അദ്ദേഹം.

ഈ കാലയളവില്‍ സംഘടനയുടെ പ്രസിഡണ്ടും രക്ഷാധികാരിയായുമായി ദീര്‍ഘകാലം പ്രവര്‍ത്തിക്കുകയും ചെയ്തു. കഴിഞ്ഞ ദിവസം അല്‍ മദീന ഹൈപ്പര്‍ മാര്‍ക്കറ്റ് ഓഡിറ്റോറിയത്തില്‍ വെച്ച് മാസ് റിയാദ് കുടുംബാഗങ്ങളുടെ നേതൃത്വത്തില്‍ അദ്ദേഹത്തിന് യാത്രയയപ്പ് വിരുന്നു സംഘടിപ്പിച്ചു. ചടങ്ങില്‍ റിയാദിലെ പ്രമുഖ സാസ്‌ക്കാരിക സാമൂഹിക പ്രവര്‍ത്തകര്‍ സംബന്ധിച്ചു. ആക്ടിംഗ് പ്രസിഡണ്ട് അശ്‌റഫ് മേച്ചീരി അധ്യക്ഷത വഹിച്ചു. പ്ലീസ് ഇന്ത്യാ ജി.സി.സി. കോഡിനേറ്ററും, ജീവകാരുണ്യ പ്രവര്‍ത്തകനുമായ ലത്തീഫ് തെച്ചി പരിപാടി ഉല്‍ഘാടനം ചെയ്തു. ഫോര്‍ക്ക രക്ഷാധികാരി നാസര്‍ കാരന്തൂര്‍ ,ഒ.ഐ.സി.സി.സെന്‍ട്രല്‍ കമ്മറ്റി ജനറല്‍ സെക്രട്ടറി അബ്ദുള്ള വല്ലാഞ്ചിറ, കെ.എം സി.സി.സെന്‍ട്രല്‍ കമ്മറ്റി വൈസ് പ്രസിഡണ്ട് ബഷീര്‍ താമരശ്ശേരി, ഒ.ഐ സി.സി. കോഴിക്കോട് ജില്ല പ്രസിഡണ്ട് മുനീര്‍ കോക്കല്ലൂര്‍, തനിമ രക്ഷാധികാരി റഹമത്ത് ഇലാഹി, ഫ്രന്‍സ് ക്രിയേഷന്‍ ചീഫ് കോഡിനേറ്റര്‍ നവാസ് വെള്ളിമാടുകുന്ന്,കെ.ഡി.എം.എഫ്, ആക്റ്റിംഗ് പ്രസിഡണ്ട് ഷമീര്‍ പുത്തൂര്‍, സദ്‌വ പ്രസിഡണ്ട് തഫ്‌സീര്‍, മാസ് ഭാരവാഹികളായ ശരീഫ് സി.കെ, ജബ്ബാര്‍ കെ.പി, ഫൈസല്‍ കക്കാട് എന്നിവര്‍ സംസാരിച്ചു.

തുടര്‍ന്ന് മൂസക്കുട്ടി നെല്ലിക്കാപറമ്പ് മറുപടി പ്രസംഗം നടത്തി. മാസ് റിയാദ് ആക്റ്റിംഗ് പ്രസിഡണ്ട് അശ്‌റഫ് മേച്ചീരി അദ്ധേഹത്തിനുള്ള മൊമന്റോ സമ്മാനിച്ചു. മാസ് റിയാദ് കുടുംബാഗങ്ങളുടെ സ്‌നേഹോപഹാരം ചടങ്ങില്‍ പ്രവര്‍ത്തകരും സമ്മാനിച്ചു. സെക്രട്ടറി ഷാജു കെ.സി സ്വാഗതവും, അബ്ദുസലാം പേക്കാടന്‍ പ്രാര്‍ത്ഥനയും പ്രോഗ്രാം കണ്‍വീനര്‍ മൊയ്ദു തോട്ടത്തില്‍ നന്ദിയും പറഞ്ഞു. സുബൈര്‍ കാരശ്ശേരി, ഷമീല്‍ കക്കാട്, സുഹാസ് ചേപ്പാലി,മുസ്തഫ നെല്ലിക്കാപറമ്പ് ,ഷംസുകാരാട്ട്, യുസഫ് പി.പി, മനാഫ് കാരശ്ശേരി എന്നിവര്‍ പരിപാടിക്ക് നേതൃത്വം നല്‍കി.