പത്തനംതിട്ട: ളാഹ വനത്തില്‍ മരിച്ച നിലയില്‍ കണ്ടെത്തിയ ശബരിമല തീര്‍ഥാടകന്‍ ശിവദാസന്റെ മരണം പൊലിസ് നടപടി മൂലമാണെന്ന ബി.ജെ.പി വാദം പൊളിയുന്നു. ശിവദാസന്‍ ശബരിമല ദര്‍ശനത്തിനു പുറപ്പെട്ടത് ഒക്ടോബര്‍ 18 ന് രാവിലെയാണെന്നും 19 ന് രാവിലെ ക്ഷേത്ര ദര്‍ശനത്തിനു ശേഷം അമ്മയെ ഫോണില്‍ വിളിച്ചിരുന്നതായും ശിവദാസന്റെ മകന്‍ 25 നു പൊലിസില്‍ നല്‍കിയ പരാതിയില്‍ പറയുന്നു.

നിലയ്ക്കലില്‍ പൊലിസ് നടപടിയുണ്ടായത് 16,17 തിയ്യതികളിലാണ്. അതിനു ശേഷമാണ് ശിവദാസന്‍ വീട്ടില്‍ നിന്നിറങ്ങിയതെന്നാണ് മൊഴിയില്‍ നിന്നും വ്യക്തമാകുന്നത്. പൊലിസ് നടപടിയിലല്ല ശിവദാസന്‍ മരിച്ചതെന്ന് വ്യക്തമാക്കി കേരളാ പൊലിസ് നേരത്തെ രംഗത്തെത്തിയിരുന്നു.

പൊലിസ് നടപടിക്കിടെയാണ് ശിവദാസനെ കാണാതായതെന്ന ആരോപണം അടിസ്ഥാനരഹിതമാണെന്ന് പത്തനംതിട്ട എസ്.പി സി. നാരായണന്‍ പറഞ്ഞു. സമൂഹത്തില്‍ തെറ്റിദ്ധാരയുണ്ടാക്കുന്ന വാര്‍ത്തകള്‍ പ്രചരിപ്പിക്കുന്നവര്‍ക്കെതിരെ നടപടിയെടുക്കുമെന്നും എസ്.പി പറഞ്ഞു.

ശബരിമല തീര്‍ത്ഥാടകനായിരുന്ന ശിവദാസന്‍ നിലയ്ക്കലുണ്ടായ പൊലിസ് നടപടിക്കിടെ കൊല്ലപ്പെടുകയായിരുന്നുവെന്ന് ആരോപിച്ച് ബി.ജെ.പി ഇന്ന് പത്തനംതിട്ടയില്‍ ഹര്‍ത്താലിന് ആഹ്വാനം ചെയ്തിരുന്നു.