ന്യൂഡല്‍ഹി: സുപ്രിംകോടതിയില്‍ പുതിയ ജഡ്ജിമാരായി രവീന്ദ്ര ഭട്ടും റിഷികേശ് റോയിയും കൂടിയെത്തിയതോടെ സുപ്രിംകോടതിയിലെ ആകെയുള്ള 34 സിറ്റിങ് ജഡ്ജിമാരില്‍ ഡല്‍ഹി സര്‍വകലാശാല കോളജ് മേറ്റുകളുടെ എണ്ണം പത്തായി.
ഇതില്‍ നാലുപേരാകട്ടെ ക്ലാസ്‌മേറ്റുകളാണ്. രവീന്ദ്ര ഭട്ടിനെയും റിഷികേശ് റോയിയെയും കൂടാതെ ചീഫ് ജസ്റ്റിസ് രഞ്ജന്‍ ഗൊഗോയ്, ഫാലി എസ്. നരിമാന്‍, ഡി.വൈ ചന്ദ്രചൂഡ്, കെ.കെ കൗള്‍, നവീന്‍ സിന്‍ഹ, ദീപക് ഗുപ്ത, ഇന്ദുമല്‍ഹോത്ര, സഞ്ജീവ് ഖന്ന എന്നിവരാണ് ഡല്‍ഹി സര്‍വകലാശാല ലോ സെന്ററില്‍നിന്ന് ബിരുദമെടുത്തവര്‍.
ചന്ദ്രചൂഡ്, എസ്.കെ കൗള്‍, രവിന്ദ്രഭട്ട്, റിഷികേശ് റോയ് എന്നിവര്‍ ഇതില്‍ ക്ലാസ്‌മേറ്റുകളായിട്ടുണ്ട്. ഇവര്‍ നാലു പേരും ഡല്‍ഹി സര്‍വകലാശാല കാംപസ് ലോ സെന്ററിലെ 1982 ബാച്ച് ബിരുദധാരികളാണ്. ചീഫ് ജസ്റ്റിസ് ഗൊഗോയ്, നരിമാന്‍, ദീപക് ഗുപ്ത എന്നിവര്‍ 1978ലാണ് ഡല്‍ഹി സര്‍വകലാശാലയില്‍നിന്ന് പഠനം പൂര്‍ത്തിയാക്കുന്നത്. നവീന്‍ സിന്‍ഹ 1979ലും പഠനം പൂര്‍ത്തിയാക്കി.
ഇന്ദു മല്‍ഹോത്രയും സഞ്ജീവ് ഖന്നയും ബിരുദം നേടുന്നത് 1983ലാണ്.
മുന്‍ സുപ്രിംകോടതി ജഡ്ജിമാരായ മദന്‍ ബി. ലോക്കൂറും എ.കെ സിക്‌റിയും ഡല്‍ഹി സര്‍വകലാശാലയില്‍നിന്ന് ബിരുദം നേടിയവരായിരുന്നു.
എല്ലാവരും രാജ്യത്തിന്റെ വിവിധ ഭാഗങ്ങളില്‍നിന്ന് പഠനത്തിനായി ഡല്‍ഹിയിലെത്തുകയും ഇവിടെ നിന്ന് ബിരുദപഠനം പൂര്‍ത്തിയാക്കുകയും ചെയ്തവരാണ്. 1924ലാണ് ഡല്‍ഹി സര്‍വകലാശാലയില്‍ ലോ ഫാക്കല്‍റ്റി തുടങ്ങുന്നത്.