കോഴിക്കോട്: മഹാത്മാ ഗാന്ധിയെയും സ്വാതന്ത്ര്യ സമര സേനാനികളെയും ജാതീയമായി അധിക്ഷേപിച്ച ബി.ജെ.പി ദേശീയ അധ്യക്ഷന്‍ അമിത് ഷായുടെ നിലപാടില്‍ കെ.എസ്.യു കോഴിക്കോട് ഗവണ്‍മെന്റ് ലോ കോളജ് യൂനിറ്റ് പ്രതിഷേധിച്ചു. ചരിത്രമറിയാത്ത അമിത് ഷായെ ഞങ്ങള്‍ ചരിത്രം പഠിപ്പിക്കാം എന്ന പ്രമേയത്തില്‍ സംഘടിപ്പിച്ച പരിപാടിയില്‍ മഹാത്മാ ഗാന്ധിയുടെ ആത്മകഥയായ 'എന്റെ സത്യാന്വേഷണ പരീക്ഷണങ്ങളുടെ' ഇംഗ്ലിഷ് പതിപ്പ് അമിത് ഷാക്ക് തപാല്‍വഴി അയച്ചു കൊടുത്തു
യൂനിറ്റ് പ്രസിഡന്റ് എ.പി അബ്ദുറഹിമാന്‍ അധ്യക്ഷനായി. കെ.എസ്.യു ജില്ലാ വൈസ് പ്രസിഡന്റ് ജറില്‍ ബോസിന് ആത്മകഥയുടെ പതിപ്പ് യൂനിറ്റ് പ്രസിഡന്റ് കൈമാറി. തുടര്‍ന്ന് ജില്ലാ പ്രസിഡന്റ് വി.ടി നിഹാല്‍, ജില്ലാ സെക്രട്ടറിമാരായ ഷാദി ഷബീബ്, വിശ്വനാഥന്‍, മനു അര്‍ജുന്‍, യൂനിറ്റ് ഭാരവാഹി നദീം മുഹമ്മദ് തുടങ്ങിയവരുടെ നേതൃത്വത്തില്‍ പ്രകടനമായി വെള്ളിമാട്കുന്ന് തപാല്‍ ഓഫിസില്‍ ചെന്നാണ് പ്രതിഷേധ സൂചകമായി ആത്മകഥയുടെ പതിപ്പ് അയച്ചുകൊടുത്തത്.