ന്യൂഡല്‍ഹി: ഉത്തരേന്ത്യക്കാരുടെ ഭക്ഷണരീതി രാജ്യവ്യാപകമായി അടിച്ചേല്‍പ്പിക്കരുതെന്ന് ആര്‍.എസ്.എസ് മുഖപത്രം പാഞ്ചജന്യ. ഗോസംരക്ഷണത്തിന്റെ പേരിലുള്ള ആക്രമണങ്ങളെ പിന്തുണയ്ക്കാനാവില്ല. ഇവര്‍ ആര്‍.എസ്.എസ് സ്ഥാപകന്‍ ഗോള്‍വാള്‍ക്കറെയും സ്വാമിവിവേകാനന്ദനെയും വായിക്കണമെന്നും ബി.ജെ.പി മുന്‍ എം.പി തരുണ്‍ വിജയ് എഴുതിയ ലേഖനത്തില്‍ പറയുന്നു.
ഇന്ത്യ എന്നാല്‍ ഹിന്ദിബെല്‍റ്റ് മാത്രമല്ല. മറ്റുഭാഷകളെയും സംസ്‌കാരത്തെയും ആദരിക്കാതെ ഇന്ത്യയുടെ ഐക്യം സാധ്യമാകില്ല. ഉത്തരേന്ത്യയിലെ ഭക്ഷ്യശീലങ്ങളെ എങ്ങനെ മൊത്തം അടിച്ചേല്‍പ്പിക്കാന്‍ കഴിയുമെന്ന് അദ്ദേഹം ചോദിക്കുന്നു.  കണ്ണൂരില്‍ യൂത്ത് കോണ്‍ഗ്രസ് പ്രവര്‍ത്തകര്‍ കാളക്കുട്ടിയെ പരസ്യമായി അറുത്ത സംഭവം അപലപനീയവും ഇന്ത്യയുടെ സംസ്‌കാരത്തിനു നിരക്കാത്തതുമാണെന്നും ലേഖനത്തില്‍ പരാമര്‍ശിക്കുന്നു.
കന്നുകാലികളെ രാഷ്ട്രീയ നേട്ടത്തിന് ഉപയോഗിക്കുന്ന കോണ്‍ഗ്രസ് - സി.പി.എം നേതാക്കള്‍ക്കെതിരേ നിയമനടപടി സ്വീകരിക്കണം. ഹിന്ദുത്വത്തെ അടുക്കളയുടെ മതമായി ചിത്രീകരിക്കാതെ പാവപ്പെട്ടവരുടെ ജീവിതം നന്നാക്കാന്‍ ശ്രമിക്കുകയാണു വേണ്ടത്. കേന്ദ്രസര്‍ക്കാര്‍ വിവിധ വികസനപ്രവര്‍ത്തനങ്ങള്‍ നടപ്പാക്കുന്നുണ്ടെങ്കിലും അനാവശ്യവിവാദങ്ങള്‍ അവയുടെ ഖ്യാതി ഇല്ലാതാക്കുകയാണ് ചെയ്യുന്നതെന്നും ലേഖനത്തില്‍ അദ്ദേഹം കുറ്റപ്പെടുത്തുന്നു.