ബംഗളൂരു: കര്‍ണാടകയില്‍ മൂന്ന് ലോക്‌സഭാ മണ്ഡലം, രണ്ട് നിയമസഭാ മണ്ഡലങ്ങളിലേക്കുള്ള ഉപതെരഞ്ഞെടുപ്പ് പോളിങ് തുടങ്ങി. കഴിഞ്ഞ നിയമസഭാ തെരഞ്ഞെടുപ്പിനു ശേഷം രൂപംകൊണ്ട കോണ്‍ഗ്രസ്- ജെ.ഡി.എസ് സഖ്യത്തിന്റെ ഭാവി നിര്‍ണയിക്കുന്ന തെരഞ്ഞെടുപ്പാണിത്.

ബി.ജെ.പിയാണ് ശക്തമായ എതിരാളിയായി മത്സരത്തിനുള്ളത്. അഞ്ച് സീറ്റുകളിലെയും ഫലം നവംബര്‍ അഞ്ചിന് പുറത്തുവരും.

കഴിഞ്ഞ തെരഞ്ഞെടുപ്പുകളില്‍ ത്രികോണ മത്സരം നടന്ന മണ്ഡലങ്ങളാണ് എല്ലാം.

മാണ്ഡ്യ, ശിവമോഗ ലോക്‌സഭാ മണ്ഡലങ്ങളിലും രാമനഗര നിയമസഭാ മണ്ഡലത്തിലും ജെ.ഡി.എസാണ് മത്സരിക്കുന്നത്. ബെല്ലാരി ലോക്‌സഭാ മണ്ഡലത്തിലും ജാംഖണ്ഡി നിയമസഭാ മണ്ഡലത്തിലും കോണ്‍ഗ്രസും.

രാമനഗരത്തില്‍ കര്‍ണാടക മുഖ്യമന്ത്രി കുമാരസ്വാമിയുടെ ഭാര്യ അനിതാ കുമാരസ്വാമിയാണ് മത്സരിക്കുന്നത്. ഇവിടെ ബി.ജെ.പി സ്ഥാനാര്‍ഥിയായി നിന്നിരുന്ന എല്‍. ചന്ദ്രശേഖര്‍ കഴിഞ്ഞദിവസം രാജിവയ്ക്കുകയും കോണ്‍ഗ്രസില്‍ ചേരുകയും ചെയ്തിരുന്നു. തെരഞ്ഞെടുപ്പിനു മുന്‍പു തന്നെ വലിയ തിരിച്ചടിയാണ് ബി.ജെ.പിക്കുണ്ടായത്.