ദുബായ് യാത്രക്കിടെ കോഴിക്കോട് ഡി.സി.സി പ്രസിഡന്റ് ടി. സിദ്ദീഖിന്റെ ഭാര്യ ഫെയ്‌സ്ബുക്കിലിട്ട ലൈവ് വീഡിയോ ചൂണ്ടിക്കാട്ടി അപവാദ പ്രചരണമെന്ന് പരാതി. താന്‍ മദ്യപിച്ചാണ് വീഡിയോയില്‍ പ്രത്യക്ഷപ്പെടുന്നതെന്ന് സൈബര്‍ സഖാക്കള്‍ അപവാദ പ്രചരണം നടത്തുകയാണെന്ന് ടി. സിദ്ദീഖ് ആരോപിച്ചു. വീഡിയോ വൈറലായതോടെ ടി. സിദ്ദീഖ് മറ്റൊരു വീഡിയോയില്‍ വിശദീകരണവുമായി രംഗത്തെത്തുകയായിരുന്നു.

കോഴിക്കോട് ജില്ലാ ഇന്‍കാസ് കമ്മിറ്റിയുടെ രൂപീകരണ യോഗത്തിനും, ഓണാഘോഷത്തിന്റെ സമാപനത്തിനും, കോഴിക്കോട് ഫ്രണ്ട്‌സിന്റെ പരിപാടികള്‍ക്കും ഹരിത ചന്ദ്രികയുടെ സമ്മേളനത്തിനുമായാണ് ടി. സിദ്ദീഖ് 20-ാം തീയതി ദുബായിലെത്തിയത്. പൊതുപരിപാടികള്‍ക്ക് ശേഷം ദുബായിലെ സുഹൃത്തുക്കള്‍ക്കും അദ്ദേഹത്തിനൊപ്പമുണ്ടായിരുന്ന മക്കള്‍ ഉള്‍പ്പെടുന്ന കുടുംബവുമൊത്ത് ഡെസേര്‍ട്ട് സഫാരിക്ക് പോയിരുന്നു. ദീര്‍ഘനേരത്തെ യാത്രക്ക് ശേഷം മരുഭൂമിയിലെത്തുമ്പോള്‍ ശക്തമായ കറ്റുണ്ടായിരുന്നു. ദീര്‍ഘമായ യാത്രക്ക് ശേഷം കുടുംബവുമൊത്ത് ഉയരമുള്ള ഒരിടത്ത് കുടുംബവുമൊത്ത് പായ വിരിച്ച് ലഘുഭക്ഷണം കഴിക്കാനായി ഇരുന്നുവെന്നും വീഡിയോയില്‍ സിദ്ദീഖ് പറയുന്നു.

ഈ വേളയില്‍ ഭാര്യ ലൈവില്‍ വന്നപ്പോള്‍, എഴുന്നേല്‍ക്കുകയും സംസാരിക്കുകയും ചെയ്തു. ഈ ദൃശ്യങ്ങളാണ് ടി. സിദ്ദീഖ് മദ്യപിച്ചെന്നു പറഞ്ഞ് വ്യാപകമായി പ്രചരിക്കുന്നത്.

മദ്യപിച്ച് കാലുറയ്ക്കാത്ത സിദ്ദീഖ് എന്ന തരത്തിലായിരുന്നു ഈ പ്രചാരണം. എന്നാല്‍ ജീവിതത്തില്‍ ഇതുവരെയും മദ്യപിക്കാത്ത, ഒരിക്കലും മദ്യപിക്കില്ലെന്ന് ജീവിതനിഷ്ഠയുള്ള തന്റെ കുടുംബ ജീവിതത്തിലെ നിമിഷങ്ങളെ വിലകുറഞ്ഞ സി.പി.എം രാഷ്ട്രീയ പ്രചാരണത്തിനായി ഉപയോഗിക്കുന്നവരെക്കുറിച്ച് സഹതാപം മാത്രമാണ് തോന്നുന്നതെന്ന് ടി. സിദ്ദീഖ് പറഞ്ഞു. സൈബര്‍ സഖാക്കളുടെ അപവാദ പ്രചാരണത്തിന് വിധേയമാകാന്‍ ഒരുക്കമല്ലെന്നും താന്‍ മദ്യപിച്ചുവെന്ന് സഖാക്കള്‍ തെളിയിക്കാനുള്ള അവസരത്തിനായി പൊലിസില്‍ പരാതി നല്‍കുമെന്നും ടി. സിദ്ദീഖ് വ്യക്തമാക്കി.