മര്‍ദനമേറ്റ് ഭാര്യ
മരിച്ചു; ഭര്‍ത്താവ്
അറസ്റ്റില്‍
ഏറ്റുമാനൂര്‍: കുടുംബവഴക്കിനെ തുടര്‍ന്ന് ഭര്‍ത്താവിന്റെ മര്‍ദനമേറ്റ് ഭാര്യ മരിച്ചു. ഏറ്റുമാനൂര്‍ സ്വകാര്യ ബസ്സ്റ്റാന്‍ഡിനു സമീപം ചിറക്കുളത്തിന്റെ കരയില്‍ താമസിക്കുന്ന ശാന്തിഭവനില്‍ വിനീതിന്റെ ഭാര്യ ആഷ (22)യാണ് മരിച്ചത്. സംഭവത്തില്‍ പൊലിസ് അറസ്റ്റ് ചെയ്ത വിനീതി (30)നെ കോടതി റിമാന്‍ഡ് ചെയ്തു.
കഴിഞ്ഞ ദിവസം രാത്രി മദ്യപിച്ചെത്തിയ വിനീതും ആഷയും തമ്മിലുണ്ടായ വാക്കേറ്റമാണ് കൊലപാതകത്തില്‍ കലാശിച്ചതെന്ന് പൊലിസ് പറഞ്ഞു. മര്‍ദനമേറ്റ് തറയില്‍ തലയടിച്ച് വീണ് ബോധരഹിതയായ ആഷയെ മെഡിക്കല്‍ കോളജ് ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരണമടയുകയായിരുന്നു.