ജൗന്‍പുര്‍: ഉയരത്തിലുള്ള മരച്ചില്ലയില്‍ നിസ്‌കരിക്കുന്ന സ്ത്രീയുടെ വീഡിയോ വൈറലാവുന്നു. വേപ്പ് മരത്തിന്റെ നേര്‍ത്ത ചില്ലയില്‍ മറ്റൊരു വസ്തുവിന്റെയും പിന്‍ബലമില്ലാതെയാണ് സത്രീയുടെ നിസ്‌കാരം.

ഉത്തര്‍പ്രദേശിലെ ജൗന്‍പുര്‍ ജില്ലയിലെ കെരാകാട്ടില്‍ നിന്നുള്ളതാണ് സംഭവമെന്ന് ദൈനിക് ഭാസ്‌കര്‍ അടക്കമുള്ള വിവിധ ഓണ്‍ലൈന്‍ മാധ്യമങ്ങളും എ.ബി.പി ന്യൂസ് ടി.വിയും റിപ്പോര്‍ട്ട് ചെയ്യുന്നു. ഇതിന്റെ വീഡിയോയും റിപ്പോര്‍ട്ടില്‍ ഉള്‍പ്പെടുത്തിയിട്ടുണ്ട്.

സ്ത്രീ മരച്ചില്ലയില്‍ നിസ്‌കരിക്കുന്നത് വീഡിയോയില്‍ വ്യക്തമായി കാണാം. മരത്തിനു താഴെ ഇതുകാണാനായി ജനങ്ങള്‍ തടിച്ചുകൂടിയിട്ടുണ്ട്. അഞ്ചു നേരത്തും സ്ത്രീ മരത്തിനു മുകളില്‍ നിസ്‌കരിക്കുന്നത് കാണാമെന്ന് ഗ്രാമവാസികള്‍ പറയുന്നു. എന്നാല്‍ സ്ത്രീ മരത്തില്‍ കയറുന്നതും ഇറങ്ങുന്നതും കാണാറില്ലെന്നും ഇവര്‍ പറയുന്നു.

നിജ്ബുദ്ദീന്‍ ഖാന്‍ എന്നയാളുടെ മകള്‍ ശബീന ബാനുവാണ് സ്ത്രീയെന്നാണ് റിപ്പോര്‍ട്ട്. വിവാഹം കഴിഞ്ഞിരുന്നെങ്കിലും ഭര്‍ത്താവുമായി പിരിഞ്ഞു ജീവിക്കുകയാണ് ഇവര്‍. ഏക മകന്‍ ഭര്‍ത്താവിന്റെ കൂടെയാണ് ജീവിക്കുന്നത്. ഇത് മാനുഷിക പ്രവര്‍ത്തനമല്ലെന്നും ജിന്നിന്റെ ബാധയുണ്ടെന്നുമാണ് ജനങ്ങളുടെ പക്ഷം.