ലഖ്‌നോ: ഉത്തര്‍ പ്രദേശ് പീഡനങ്ങളുടെ സംസ്ഥാനമെന്ന അപഖ്യാതിയിലേക്ക്. നിരന്തരമായി പീഡന വാര്‍ത്തകളും സ്ത്രീകള്‍ക്കും ദലിതര്‍ക്കുമെതിരേയുള്ള അതിക്രമങ്ങളും പുറത്തു വന്നുകൊണ്ടിരിക്കുന്ന സംസ്ഥാനത്തു നിന്നും നാണക്കേടിന്റെ മറ്റൊരു വാര്‍ത്തകൂടി പുറത്തു വന്നു.
സംസ്ഥാനത്തെ നഗരങ്ങളില്‍ മാനഭംഗ വീഡിയോകള്‍ യഥേഷ്ടം വിറ്റു പോവുകയാണെന്നാണ് പുതിയ വിവരം.യു.പിയിലെ കടകളില്‍ നിന്നും ആയിരകണക്കിന് റേപ്പ് വീഡിയോകളാണ് വിറ്റു പോവുന്നതെന്ന് ടൈംസ് ഒഫ് ഇന്ത്യയുടെ റിപ്പോര്‍ട്ടില്‍ വ്യക്തമാക്കുന്നു. അമ്പതു മുതല്‍ നൂറ്റിയമ്പതു വരെ രൂപയാണത്രെ ഇതിന്റെ വില. പൊലിസിന്റെയും അധികൃതരുടെയും മൂക്കിനു മുന്നിലാണ് കച്ചവടം നടക്കുന്നത്.

ആഗ്രയിലാണ് ഇത്തരം വീഡിയോകള്‍ സുലഭമായി ലഭിക്കുന്നത്. അക്രമികള്‍ പകര്‍ത്തുന്ന വീഡിയോ ദൃശ്യങ്ങള്‍ തന്നെയാണ് പലയിടത്തും വില്‍പ്പനക്കായെത്തുന്നതെന്ന വിശേഷവും ചിലവയ്ക്കുണ്ട്. ഇത്തരം രംഗങ്ങള്‍ വില്‍ക്കാന്‍ കച്ചവടക്കാര്‍ക്ക് ഒരു മടിയുമില്ലെന്നും വാര്‍ത്തയില്‍ സൂചിപ്പിക്കുന്നു.

ഇരയെ പേടിപ്പിച്ച് വീണ്ടും ഉപദ്രവിക്കാനും ചിലര്‍ ദൃശ്യങ്ങള്‍ ഉപയോഗിക്കുന്നുണ്ടത്രെ. യു.പിയിലെ ബുലന്ദ്‌ഷെഹറില്‍ കുടംബത്തെ കൊള്ളയടിക്കുകയും കൂട്ടബലാത്സഗത്തിനിരയാക്കുകയും ചെയ്ത സംഭവം ദേശീയ തലത്തില്‍ തന്നെ ചര്‍ച്ചയായിരിക്കെയാണ് പുതിയ വാര്‍ത്ത.