റിയാദ്: സഊദിയുടെ വിവിധ പ്രദേശങ്ങളില്‍ കനത്തമഴ തുടരുന്നു. വിവിധയിടങ്ങളിലുണ്ടായ കാറ്റിലും മിന്നലിലും കനത്തനാശമുണ്ടായി. ദിവസങ്ങളായി തുടരുന്ന മഴയിലും മലവെള്ളപ്പാച്ചിലിലും പലയിടങ്ങളിലും റോഡുകള്‍ ഒലിച്ചുപോവുകയും നിരവധിപേര്‍ക്ക് ജീവഹാനി സംഭവിക്കുകയും ചെയ്തു.
മഴയെ തുടര്‍ന്ന് മക്ക പ്രവിശ്യയില്‍ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചു. ജിദ്ദയിലെയും മക്കയിലെയും മുഴുവന്‍ സര്‍വകലാശാലകള്‍ക്കും റാബിഗ്, ഖുലൈസ് എന്നിവിടങ്ങളിലെ സ്‌കൂളുകള്‍ക്കും അവധിയായിരിക്കുമെന്ന് മക്ക പ്രവിശ്യ വിദ്യാഭ്യാസ വകുപ്പ് അറിയിച്ചു.
അതേസമയം മിക്ക റോഡുകളും മഴയില്‍ മൂടപ്പെട്ട നിലയിലാണ്. അന്തരീക്ഷം പകല്‍ മുഴുവന്‍ മേഘാവൃതമായിരുന്നു. വടക്ക് പടിഞ്ഞാറന്‍ പ്രദേശങ്ങളില്‍ ഇന്നലെ ഉച്ചവരെ ഭേദപ്പെട്ട മഴയാണ് അനുഭവപ്പെട്ടത്. അതിശക്തമായ കാറ്റിന്റെ അകമ്പടിയോടെ പേമാരിക്ക് സാധ്യതയുണ്ടെന്നും വാഹനമോടിക്കുന്നവര്‍ പ്രത്യേകം ശ്രദ്ധിക്കണമെന്നും അധികൃതര്‍ മുന്നറിയിപ്പ് നല്‍കി.