തൃശ്ശിലേരി: ഹയര്‍ സെക്കന്‍ഡറി വിഭാഗത്തിലെ വിദ്യാര്‍ഥികളുടെ പഠന നിലവാരം മെച്ചപ്പെടുത്തുന്നതിന് ആവിഷ്‌ക്കരിച്ച 'ഹൈ ഫ്‌ലൈ' പദ്ധതിയുടെ പ്രവര്‍ത്തനം ആരംഭിച്ചു. കുട്ടികളുടെ പഠന രീതികള്‍ മനസ്സിലാക്കി അതിന്റെ അടിസ്ഥാനത്തില്‍ പഠന വിഭവങ്ങള്‍ ഒരുക്കുക എന്നതാണ് പദ്ധതിയുടെ ലക്ഷ്യം. വിദ്യാലയന്തരീക്ഷം കൂടുതല്‍ സൗഹൃദമാക്കുകയും, ആധുനിക സംവിധാനങ്ങളുടെ സഹായത്തോടെ പഠനം കാര്യക്ഷമമാക്കുക എന്നതും പദ്ധതിയുടെ ലക്ഷ്യമാണ്. ഹൈ ഫ്‌ലൈയുടെ ഭാഗമായി വിദ്യാര്‍ഥികള്‍ക്കും അധ്യാപകര്‍ക്കും രക്ഷിതാക്കള്‍ക്കും പ്രത്യേകം പരിശീലനം സംഘടിപ്പിച്ചു. പരിശീലനത്തില്‍ കില ട്രെയിനര്‍ വി.കെ സുരേഷ് ബാബു ക്ലാസെടുത്തു. പരിശീലനം പി.ടി.എ പ്രസിഡന്റ് വി.വി രാമകൃഷ്ണന്‍ ഉദ്ഘാടനം ചെയ്തു. പ്രിന്‍സിപ്പല്‍ വി ശശിധരന്‍ അധ്യക്ഷനായി. കെ.ബി സിമില്‍ സ്വാഗതവും കെ.എസ് നിസ്സോ നന്ദിയും പറഞ്ഞു. മദര്‍ പി.ടി.എ പ്രസിഡന്റ് സിന്ധു സജി, ലൈബ്രറി കൗണ്‍സില്‍ താലൂക്ക് സെക്രട്ടറി ആര്‍ അജയകുമാര്‍, വിദ്യാര്‍ഥിനി ടാന്‍സിയ പി.ബെന്നി എന്നിവര്‍ സംസാരിച്ചു.