കോട്ടയം: മുഖ്യമന്ത്രി പിണറായി വിജയന്റെ നേതൃത്വത്തിലുളള സംസ്ഥാന സര്‍ക്കാരിന്റെ ഒന്നാം വാര്‍ഷികത്തോടനുബന്ധിച്ച് ഇന്‍ഫര്‍മേഷന്‍- പബ്ലിക് റിലേഷന്‍സ് വകുപ്പിന്റെ ആഭിമുഖ്യത്തില്‍ ഒരുക്കിയിട്ടുളള പ്രദര്‍ശന വാഹനം- നവകേരള എക്‌സ്പ്രസ് ഇന്നുമുതല്‍ മൂന്ന് ദിവസങ്ങളില്‍ ജില്ലയിലെ വിവിധ ഭാഗങ്ങളില്‍ പര്യടനം നടത്തും.
കഴിഞ്ഞ ഒരു വര്‍ഷത്തിനുള്ളില്‍ സംസ്ഥാനം വിവിധ മേഖലകളില്‍ നടത്തിയിട്ടുളള മുന്നേറ്റങ്ങളുടെ നേര്‍ക്കാഴ്ച ഒരുക്കുന്ന ചിത്രപ്രദര്‍ശനം, വീഡിയോ പ്രദര്‍ശനം എന്നിവ വാഹനത്തില്‍ ഒരുക്കിയിട്ടുണ്ട്.കടമ്പനാട് ജയചന്ദ്രന്റെ നേതൃത്വത്തിലുള്ള കലാസംഘത്തിലെ കലാകാരന്‍മാര്‍ അണിനിരക്കുന്ന കലാജാഥയും ഉണ്ടായിരിക്കും. വൈക്കം ബോട്ടുജെട്ടിയില്‍ രാവിലെ 10.30 ന് നടക്കുന്ന ചടങ്ങില്‍ സി.കെ.ആശ എം.എല്‍.എ ജില്ലയിലെ പര്യടനം ഫ്‌ളാഗ് ഓഫ് ചെയ്യും.
നഗരസഭാ ആക്ടിങ് ചെയര്‍പേഴ്‌സണ്‍ നിര്‍മ്മല ഗോപി, വൈസ് ചെയര്‍പേഴ്‌സണ്‍ സി. മണിയമ്മ, കൗണ്‍സിലര്‍ ആര്‍. സന്തോഷ്, ഇന്‍ഫര്‍മേഷന്‍- പബ്ലിക് റിലേഷന്‍സ് വകുപ്പ് മേഖലാ ഡെപ്യൂട്ടി ഡയറക്ടര്‍ കെ. അബ്ദുല്‍ റഷീദ് എന്നിവര്‍ സംബന്ധിക്കും. തുടര്‍ന്ന് തലയോലപറമ്പ്, കുറുപ്പന്തറ, കുറവിലങ്ങാട്, പാല എന്നിവിടങ്ങളില്‍ പ്രദര്‍ശനവും കലാപരിപാടികളും നടത്തും. നാളെ ഈരാറ്റുപേട്ട, കാഞ്ഞിരപ്പള്ളി, പൊന്‍കുന്നം, പാമ്പാടി, കറുകച്ചാല്‍ എന്നിവിടങ്ങളില്‍ വാഹനം പര്യടനം നടത്തും.