മണ്ണാര്‍ക്കാട്: ആദിവാസികളായി കഴിയുന്ന അട്ടപ്പാടിയിലെ മലവേടന്‍ വിഭാഗത്തിന് താല്‍കാലികാശ്വാസം. ജോലി ഒഴികെയുളള വിദ്യാഭ്യാസ, മറ്റ് സര്‍ക്കാര്‍ ആനുകൂല്യങ്ങള്‍ക്ക് ലഭിക്കുന്നതിന് ജാതി സര്‍ട്ടിഫിക്കറ്റ് നല്‍കാന്‍ ഉത്തരവായി. തഹസില്‍ദാര്‍ക്കാണ് പ്രസ്തുത സര്‍ട്ടിഫിക്കറ്റ് നിയമവിധേയമായി നല്‍കുന്നതിനുളള ചുമതല നല്‍കിയിരിക്കുന്നത്. കഴിഞ്ഞ രണ്ടു വര്‍ഷമായി ആദിവാസികളിലെ മലവേടന്‍ വിഭാഗത്തിന് വിദ്യാഭ്യാസ ആവശ്യങ്ങളടക്കമുളള വിവിധ ആവശ്യങ്ങള്‍ക്ക് ജാതി സര്‍ട്ടിഫിക്കറ്റ് ലഭിക്കാത്തത് മൂലം ദുരിതത്തിലായിരുന്നു.
അട്ടപ്പാടിയില്‍ 200ഓളം കുടുംബങ്ങളാണ് സര്‍ക്കാറിന്റെ യാതൊരു ആനുകൂല്യവും ലഭിക്കാതെ തഴയപ്പെട്ട് കിടക്കുന്നത്. കാലങ്ങളായുളള ഇവരുടെ മുറവിളികള്‍ക്കാണ് താല്‍കാലികമായെങ്കിലും പരിഹാരമായത്. ഈ വിഭാഗത്തെ ട്രൈബല്‍ വകുപ്പിന്റെ രേഖകളിലുള്‍പ്പെടുത്താനും ജോലി സംബന്ധമായുളള ജാതി സര്‍ട്ടിഫിക്കറ്റിന് കീര്‍ത്താഡ്‌സിന്റെ പഠനം നടത്താനും ഇതുമൂലം കേന്ദ്ര - സംസ്ഥാന സര്‍ക്കാറുകളില്‍ ഈ വിഭാഗത്തിന് സംവരണത്തില്‍ ജോലിയും ആനുകൂല്യങ്ങള്‍ ലഭിക്കുന്നതിനുവേണ്ട നടപടികള്‍ സ്വീകരിച്ചുവരുന്നതായും തഹസില്‍ദാര്‍ അറിയിച്ചു. നിലവില്‍ ഇരുളര്‍, മുകുഡര്‍, കുറുമ്പര്‍ എന്നീ വിഭാഗത്തില്‍ മാത്രമാണ് അട്ടപ്പാടിയിലെ ആദിവാസികളായി സര്‍ക്കാര്‍ അംഗീകരിച്ചിരിക്കുന്നത്.