സുഗന്ധങ്ങള്‍ ആഘോഷങ്ങള്‍ക്ക് മാത്രമല്ല. പൂജകളിലും പുണ്യ സ്ഥലങ്ങളിലും മാത്രം ഉപയോഗിക്കാനുള്ളതുമാത്രവുമല്ല. ദേഹത്തുപൂശാനും ദുര്‍ഗന്ധം അകറ്റാനും ഒക്കെ ഉപയോഗിക്കുന്ന സുഗന്ധങ്ങള്‍ക്ക് രോഗശാന്തി വരുത്താനും അസുഖങ്ങള്‍ സുഖപ്പെടുത്താനും കഴിവുണ്ട്. മനസിനെയും ശരീരത്തെയും സുഖപ്പെടുത്താന്‍ ശേഷിയുള്ള സുഗന്ധങ്ങളെക്കുറിച്ച്.

1
മനുഷ്യന്റെ സുഖജീവിതത്തിനുള്ളതാണ് സുഗന്ധങ്ങള്‍ എന്ന് മനസിലാക്കേണ്ടതുണ്ട്. ചൂടുകാലത്തെന്നപോലെ മഴക്കാലത്തും തണുപ്പുകാലത്തും വ്യത്യസ്ത ചേരുവകളുള്ള പാനീയങ്ങള്‍ കുടിക്കാറുണ്ടല്ലോ. ഇവയുടെ എല്ലാം സുഗന്ധങ്ങള്‍ വ്യത്യസ്തമാണെന്നു കാണാം. അതായത് കാലങ്ങള്‍ക്കനുസരിച്ച് മനുഷ്യന്‍ ഉപയോഗിക്കുന്ന, ആസ്വദിക്കുന്ന സുഗന്ധങ്ങള്‍ക്കും ആ സുഗന്ധങ്ങള്‍ ചേരുന്ന പാനീയങ്ങള്‍ക്കും മാറ്റം വരുന്നു എന്നുകാണാം.
കസ്തൂരിയും കുന്തിരിക്കവും വരെ മനുഷ്യന്റെ ജീവിതവുമായി ബന്ധപ്പെട്ടിരിക്കുന്നു. അത് പല രീതിയില്‍ അവന്റെ ശരീരത്തെ ബാധിക്കുന്നു.
ഉഴിച്ചിലിന്റെയും മറ്റും സമയത്ത് സുഗന്ധമുള്ള എണ്ണകളും മറ്റും പുരട്ടുന്നതിന്റെ കാരണവും അതുതന്നെയാണ്.
അരോമതെറാപ്പിയില്‍ ശാരീരികവും മാനസികവുമായ ആരോഗ്യത്തിന് ഇത്തരത്തില്‍ സുഗന്ധ എണ്ണകളുള്‍പ്പെടെയുള്ളവ ശരീരത്തില്‍ ഉപയോഗിക്കാറുണ്ട്. ഇവയെല്ലാം വ്യത്യസ്തങ്ങളായ ഗുണത്തിനും ഫലത്തിനും വേണ്ടിയാണ് ഉപയോഗിക്കുന്നതെന്നും മനസിലാക്കണം. ചുറ്റുപാടിന് സുഗന്ധമേകുക, ശ്വസനത്തിന് സുഗന്ധം നല്‍കുക, കുളിക്കുന്ന വെള്ളം സുഗന്ധപൂരിതമാക്കുക, ഉഴിച്ചിലിനും സുഗന്ധമുള്ള എണ്ണ ഉപയോഗിക്കുക എന്നിവയെല്ലാം ഇതില്‍പെടുന്നു.
അപ്പോള്‍ രോഗങ്ങള്‍ക്കനുസരിച്ച് അവയുടെ സുഖപ്രാപ്തിക്ക് സുഗന്ധത്തിന് ഏറെ പ്രാധാന്യമുണ്ടെന്നു മനസിലാക്കാം. അത്തരത്തില്‍ ഓരോ രോഗത്തിനും അനുയോജ്യമായതും വേഗം സുഖപ്പെടുത്തുന്നതുമായ സുഗന്ധങ്ങളെപ്പറ്റിയാണ് ഇനി വിവരിക്കുന്നത്.

(അടുത്താഴ്ച: ക്ഷീണവും
തളര്‍ച്ചയും
അകറ്റാന്‍ യൂക്കാലി)