ബേക്കല്‍: യുവാവിനെയും സുഹൃത്തിനെയും ആക്രമിച്ച് കൊലപ്പെടുത്താന്‍ ശ്രമിച്ച കേസിലെ മുഖ്യപ്രതിയെ പൊലിസ് അറസ്റ്റുചെയ്തു. കീഴൂര്‍ പടിഞ്ഞാറിലെ ലത്വീഫിനെ (30)യാണ് ബേക്കല്‍ എസ്.ഐ കെ.പി വിനോദ് കുമാറിന്റെ നേതൃത്വത്തിലുള്ള പൊലിസ് സംഘമാണ് ക്രിക്കറ്റ് കളിക്കുന്നതിനിടെ പ്രതിയെ അറസ്റ്റു ചെയ്തത്.
ഇക്കഴിഞ്ഞ സെപ്റ്റംബര്‍ ഏഴിന് ഉച്ചയ്ക്ക് കളനാട് ഹെല്‍ത്ത് സെന്ററിന് സമീപം വച്ച് മേല്‍പ്പറമ്പ് കൈനോത്ത് സ്വദേശി ഫിറോസിനെയും സുഹൃത്ത് മൊയ്തീന്‍ നാസറിനെയും ആക്രമിച്ചു കൊലപ്പെടുത്താന്‍ ശ്രമിച്ച കേസിലെ മുഖ്യപ്രതിയാണ് ലത്വീഫ്. കേസുമായി ബന്ധപ്പെട്ട് കീഴൂര്‍ സ്വദേശികളായ ഷാന്‍ എന്ന ഷാനവാസ് (28), അബു താഹിര്‍ (24) എന്നിവരെ നേരത്തെ അറസ്റ്റു ചെയ്തിരുന്നു.
നരഹത്യാശ്രമത്തിനാണ് സംഘത്തിനെതിരെ കേസെടുത്തത്. അക്രമത്തില്‍ ഫിറോസിന് ഗുരുതരമായി പരുക്കേല്‍ക്കുകയും മൂക്കിന്റെ പാലം തകരുകയും ചെയ്തിരുന്നു. അറസ്റ്റിലായ ലത്വീഫ് 2018 മാര്‍ച്ച് മാസത്തില്‍ പൂഴികടത്ത് തടയാന്‍ ശ്രമിച്ച പൊലിസ് ഉദ്യോഗസ്ഥനെ കൈയേറ്റം ചെയ്യുകയും ക്യത്യനിര്‍വഹണം തടസ്സപ്പെടുത്തുകയും ചെയ്ത കേസിലും പ്രതിയാണെന്ന് പൊലിസ് പറഞ്ഞു. ഇതിനു പുറമെ കാസര്‍കോട് സ്‌റ്റേഷനിലും ബേക്കല്‍ സ്‌റ്റേഷനിലും ലത്വീഫിനെതിരെ കേസ് നിലവിലുണ്ടെന്നും ബേക്കല്‍ പൊലിസ് പറഞ്ഞു.