പാപ്പിനിശേരി:തിരക്കേറിയ പാപ്പിനിശ്ശേരി ദേശീയപാതയില്‍ ടെലിഫോണ്‍ എക്‌സ്‌ചേഞ്ചിന് സമീപത്തെ കലുങ്കിന് മുള വേലി കെട്ടി നാട്ടുകാരുടെ പ്രതിഷേധം.
വാഹനമിടിച്ച് പല തവണ തകര്‍ത്ത കലുങ്കിന്റെ ഭിത്തി കഴിഞ്ഞ രണ്ട് വര്‍ഷമായിട്ടും അധികൃതര്‍ പുനര്‍ നിര്‍മിച്ചിരുന്നില്ല. ഈ കലുങ്കിന്റെ മുകള്‍ ഭാഗം പൂര്‍ണമായി ടാറിങ്ങ് നടത്തി റോഡിന്റെ ഭാഗമാക്കിയതിനാല്‍ കാല്‍നട യാത്രക്കാര്‍ ഇവിടെ പതിവായി അപകടത്തില്‍പ്പെടാറുണ്ട്.
കൂടാതെ നിരവധി വാഹനങ്ങളും ഭിത്തിയില്ലാത്തതിനാല്‍ കലുങ്കിന്റെ താഴെയുള്ള തോട്ടിലേക്ക് വീഴുന്നതും പതിവ് സംഭവങ്ങളാണ്.
ഭിത്തിയില്ലാത്തത് മൂലമുണ്ടാകുന്ന അടിക്കടി അപകടങ്ങളും അവയുടെ കണക്കും രേഖപ്പെടുത്തി പല തവണ ദേശീയ പാതാ വിഭാഗത്തിന് പരാതി നല്‍കിയിട്ടും ഒരു നടപടിയും സ്വീകരി ക്കാത്തതിനെ തുടര്‍ന്നാണ് നാട്ടുകാര്‍ പ്രതിഷേധ വേലി തീര്‍ത്തത്.