ന്യൂഡല്‍ഹി: ഗുജറാത്ത് വംശഹത്യക്കിടെയുണ്ടായ അതിനിഷ്ടൂര സംഭവങ്ങളിലൊന്നായ ഗുല്‍ബര്‍ഗ് ഹൗസിങ് സൊസൈറ്റി കൂട്ടക്കൊലക്കേസില്‍ ജീവപര്യന്തം തടവിന് ശിക്ഷിച്ച രണ്ടുപേര്‍ക്ക് സ്ഥിരം ജാമ്യം. രാജു മാമൊ കനിയോ എന്ന രാംവതര്‍ തിവാരി, ദിനേശ് പ്രഭുദാസ് ശര്‍മ എന്നിവര്‍ക്ക് ഗുജറാത്ത് ഹൈക്കോടതിയാണ് ജാമ്യം നല്‍കിയത്. ജയിലിലെ നല്ല നടപ്പ് ചൂണ്ടിക്കാട്ടിയാണ് ഹൈക്കോടതിയുടെ നടപടി. 25,000 രൂപയുടെ ബോണ്ടിന്‍മേലും സംസ്ഥാനം വിട്ടുപോവരുതെന്നുമുള്ള വ്യവസ്ഥയോടെയാണ് ജാമ്യം. ഇരകളുടെ സുരക്ഷ മുന്‍നിര്‍ത്തി ഇവരുടെ ജാമ്യം നിഷേധിക്കണമെന്ന് പ്രോസികൂഷനും ഇരകളുടെ അഭിഭാഷകരും ശക്തമായി വാദിച്ചെങ്കിലും ഇത് അവഗണിച്ചാണ് ജസ്റ്റിസ് ബേബെ ത്രിവേദിയുടെ ബെഞ്ചിന്റെ നടപടി. കേസില്‍ ജീവപര്യന്തം തടവിനു ശിക്ഷിച്ച 11 പേരില്‍ അഞ്ചുകുറ്റവാളികള്‍ നേരത്തെ തന്നെ ജാമ്യത്തിലിറങ്ങിയിരുന്നു.

കോണ്‍ഗ്രസ്സിന്റെ മുന്‍ ലോക്‌സഭാംഗമായ ഇഹ്‌സാന്‍ ജാഫ്രിയടക്കമുള്ള 69 പേര്‍ കൊലചെയ്യപ്പെട്ട കേസില്‍ 36 പേരെ വെറുതെവിട്ടും 24 പേരെ ശിക്ഷിച്ചും കഴിഞ്ഞവര്‍ഷമാണ് അഹ്മദാബാദ് പ്രത്യേക കോടതി ഉത്തരവിട്ടത്.

2002 ഫെബ്രുവരി 27ന് ഗോദ്രയില്‍ തീവണ്ടി അഗ്നിക്കിരയാക്കപ്പെട്ടതിനെത്തുടര്‍ന്ന് പൊട്ടിപ്പുറപ്പെട്ട വംശഹത്യക്കിടെയുണ്ടായ ഏറ്റവും വലിയ രണ്ടാമത്തെ ഭീകരസംഭവമാണ് ഇഹ്‌സാന്‍ ജാഫിയും കുടുംബവും ഉള്‍പ്പെടെയുള്ളവര്‍ താമസിച്ച ഗുല്‍ബര്‍ഗ് ഹൗസിങ് സൊസൈറ്റി പാര്‍പ്പിടസമുച്ചയത്തില്‍ ഇരുപതിനായിരത്തോളം വരുന്ന അക്രമികള്‍ നടത്തിയ കൂട്ടക്കൊല. 29 വലിയ ബംഗ്ലാവുകളും 10 ഫഌറ്റുകളുമടങ്ങുന്ന ഗുല്‍ബര്‍ഗ് ഹൗസിങ് സൊസൈറ്റിയിലെ താമസക്കാരില്‍ ബഹുഭൂരിഭാഗവും മുസ്‌ലിംകളായിരുന്നു. മണിക്കൂറുകളോളം ഹൗസിങ് സൊസൈറ്റി ഉപരോധിച്ച ശേഷമാണ് അക്രമികള്‍ കൃത്യം നടപ്പാക്കിയത്. 39 മൃതദേഹങ്ങള്‍ മാത്രമാണ് സംഭവസ്ഥലത്തു നിന്നു കണ്ടെത്തിയത്. 30 പേരെ കാണാതായി. എന്നാല്‍ പിന്നീട് കാണാതായവരെയെല്ലാം കൊല്ലപ്പെട്ടതായി പ്രഖ്യാപിക്കുകയായിരുന്നു.

2 more accused in Gulberg massacre case granted bail