അമ്പലപ്പുഴ: ചികിത്സയില്‍ കഴിയുന്ന കുട്ടികളെ മറ്റ് സൗകര്യം ഒരുക്കാതെ വാര്‍ഡില്‍ പെയിന്റിംഗ് ജോലി ആരംഭിച്ചത് വാക്കേറ്റത്തിനിടയാക്കി. വണ്ടാനം മെഡിക്കല്‍ കോളജ് ആശുപയിലെ കുട്ടികളുടെ ചികിത്സാ വിഭാഗമായ ഒന്നാം വാര്‍ഡിലാണ് ഇന്നലെ രാവിലെയോടെ സംഭവം. ആശുപത്രി മോഡിപിടിപ്പിക്കലുമായി ബന്ധപ്പെട്ട് തൊഴിലാളികള്‍ വാര്‍ഡിലെത്തി ചുമലിലും സീലിംഗിലും പെയിന്റിംഗ് ജോലി ആരംഭിച്ചു. എന്നാല്‍ ഈ വാര്‍ഡില്‍ ചികിത്സയില്‍ കഴിയുന്ന കുട്ടികളെ വേറെ വാര്‍ഡുകളിലേക്ക് മാറ്റാതെയായിരുന്നു ബന്ധപ്പെട്ടവര്‍ തൊഴിലാളികളെ പെയിന്റിംഗ് ജോലിക്കായി പറഞ്ഞയച്ചത്.
ജോലി ആരംഭിച്ചതോടെ പെയിന്റ് തെറിച്ച് രോഗികളായ കുട്ടികളുടേയും ബന്ധുക്കളുടേയും ദേഹത്ത് വീഴുകയും പെയിന്റിന്റെ അസഹ്യമായ ദുര്‍ഗന്ധത്തെ തുടര്‍ന്ന് കുട്ടികള്‍ക്ക് ശ്വാസം മുട്ടലും ചുമയും അനുഭവപ്പെടുകയുമായിരുന്നു.
ഇതോടെ തൊഴിലാളികളും കുട്ടികളുടെ ബന്ധുക്കളും തമ്മില്‍ വാക്കേറ്റത്തിലായി. സാധാരണ മറ്റ് സൗകര്യങ്ങള്‍ ഏര്‍പ്പെടുത്തിയതിനു ശേഷമാണ് അറ്റകുറ്റപണി നടത്തുന്നത്. എട്ട് ക്യാബിനുകളാണ് ഒന്നാം വാര്‍ഡില്‍ കുട്ടികള്‍ക്കായി സജീകരിച്ചിരിക്കുന്നത്. ഒന്നാമത്തെ ക്യാബിനില്‍ പെയിന്റടി തുടങ്ങുമ്പോള്‍ കുട്ടികളെ മറ്റ് ക്യബിനിലേക്ക് മാറ്റുകയും ജോലി പൂര്‍ത്തിയായതിനുശേഷം കുട്ടികളെ വീണ്ടും തിരിച്ചുകൊണ്ടുവരുകയുമാണ് വേണ്ടത്.
എന്നാല്‍ ഇതിന് വാര്‍ഡിന്റെ ചുമതല വഹിച്ചിരുന്നവരോ മറ്റ് ഉത്തരവാദിത്വപെട്ടവരോ തയാറാവാതെ ജോലിക്കാരെ പറഞ്ഞുവിടുകയാണുണ്ടായത്. പ്രതിഷേധത്തെ തുടര്‍ന്ന് ഉച്ചയോടെ തൊഴിലാളികള്‍ ജോലി നിര്‍ത്തിവച്ചു.