കൊച്ചി: പുതിയ ഐ.എസ്.എല്‍ സീസണിലേക്കുള്ള കേരള ബ്ലാസ്റ്റേഴ്‌സിന്റെ ക്യാപ്റ്റനായി നൈജീരിയന്‍ ഫുട്‌ബോള്‍ താരം ബര്‍ത്‌ലോമിയോ ഓഗ്ബച്ചെയെ തിരഞ്ഞെടുത്തു. 

കഴിഞ്ഞ രണ്ടു സീസണുകളില്‍ ടീമിനെ നയിച്ച സന്ദേശ് ജിങ്കനെ മാറ്റിയാണ് കോച്ച് എല്‍കോ ഷട്ടോറി ഐ.എസ്.എല്‍ ആറാം സീസണിലേക്കുള്ള പുതിയ ടീം ക്യാപ്റ്റനെ പ്രഖ്യാപിച്ചത്. ഷട്ടോരി ബ്ലാസ്റ്റേഴ്‌സിന്റെ ഹെഡ് കോച്ചായി ചുമതലയേറ്റതിന് പിന്നാലെയാണ് ഒഗ്ബച്ചെയും ടീമിന്റെ ഭാഗമാകുന്നത്. കഴിഞ്ഞ സീസണില്‍ നോര്‍ത്ത് ഈസ്റ്റ് യുനൈറ്റഡിന് വേണ്ടി 19 മത്സരങ്ങളില്‍ നിന്ന് 12 ഗോളുകള്‍ നേടിയിട്ടുണ്ട്.

സീസണിലെ ഗോള്‍ഡന്‍ ബൂട്ട് റണ്ണര്‍ അപ് കൂടിയാണ് ഈ നൈജീരിയന്‍ ഗോളടിയന്ത്രം. ഫ്രാന്‍സ്, സ്‌പെയിന്‍, ഇംഗ്ലണ്ട്, നെതര്‍ലന്റ്‌സ്, ഗ്രീസ് തുടങ്ങിയ രാജ്യങ്ങളിലെ ക്ലബ്ബുകള്‍ക്ക് വേണ്ടി കളിച്ച ശേഷമാണ് നോര്‍ത്ത് ഈസ്റ്റ് യുനൈറ്റഡിന് വേണ്ടി ഒഗ്‌ബെച്ചെ കളത്തിലിറങ്ങിയത്.