അമ്പലപ്പുഴ: ആലപ്പുഴ മെഡിക്കല്‍ കോളജ് ആശുപത്രി പരിസരത്തെ ഹോട്ടലുകളില്‍ ആരോഗ്യവകുപ്പ് വീണ്ടും മിന്നല്‍ പരിശോധന നടത്തി. ശുചിത്വം പാലിക്കാത്ത ഒരു ഹോട്ടലിന് നോട്ടീസ് നല്‍കി.
അമ്പലപ്പുഴ വടക്ക് പഞ്ചായത്ത് മെഡിക്കല്‍ ഓഫീസര്‍ ഡോ. ഷിബു സുകുമാരന്റെ നിര്‍ദേശ പ്രകാരം അമ്പലപ്പുഴ അര്‍ബന്‍ ഹെല്‍ത്ത് ട്രെയിനിംഗ് സെന്ററിലെ ഹെല്‍ത്ത് ഇന്‍സ്‌പെക്ടര്‍ സ്‌നേഹലതയുടെ നേതൃത്വത്തിലുളള സംഘമാണ് ഇന്നലെ ആശുപത്രി വളപ്പില്‍ പ്രവര്‍ത്തിക്കുന്ന ക്യാന്റീനിലും സമീപത്തെ ഹോട്ടലുകളിലും തുടര്പരിശോധന നടത്തിയത്. തിങ്കളാഴ്ച ഡോ ഷിബു സുകുമാരന്റെ നേതൃത്വത്തിലുളള സംഘം നടത്തിയ പരിശോധനയില്‍ ക്യാന്റീനും മറ്റ് ഹോട്ടലുകളും വൃത്തിഹീനമായാണ് പ്രവര്‍ത്തിക്കുന്നതെന്ന് തെളിഞ്ഞിരുന്നു.
തുടര്‍ന്ന് 2 ദിവസനത്തിനുളളില്‍ ക്യാന്റീനും മറ്റ് ഹോട്ടലുകള്‍ 7 ദിവസത്തിനകവും വൃത്തിയാക്കണമെന്ന് നിര്‍ദേശിച്ചിരുന്നു. ഇതിന്റെ അടിസ്ഥാനത്തില്‍ സംഘം ഇന്നലെ ഇവിടങ്ങളില്‍  വീണ്ടും പരിശോധനക്കെത്തിയത്. ക്യാന്റീന്റെ അടുക്കളയും പരിസരവും വൃത്തിയാക്കിയിരുന്നു.
പച്ചക്കറികള്‍ ഉള്‍പ്പെടെയുളള ചില സാധനങ്ങള്‍ നിലത്തുവെക്കുന്നത് ഒഴിവാക്കണമെന്ന് സംഘം നിര്‍ദേശിച്ചു. ഇവിടുത്തെ ജീവനക്കാര്‍ക്കെല്ലാം നിര്‍ബന്ധമായും ഹെല്‍ത്ത് കാര്‍ഡ് എടുക്കണമെന്നും ഇതിനുളള പ്രതിരോധ കുത്തിവെയ്പ് ഉള്‍പ്പെടെയുളള നടപടികള്‍ ഇന്ന് ആരംഭിക്കണമെന്നും സംഘം നിര്‍ദ്ദേശിച്ചു. സമീപത്തെ സഫ, മഡോണ എന്നീ ഹോട്ടലുകളിലും സംഘം പരിശോധന നടത്തി. നേരത്തെ നല്‍കിയ സമയപരിധി തിങ്കളാഴ്ച അവസാനിക്കുന്നതിനാല്‍ 2 ഹോട്ടലുകളും അടച്ചിട്ട് ശുചീകരണ പ്രവര്‍ത്തനം നടത്തണമെന്നും തിങ്കളാഴ്ചക്കകം ഇവ പരിഹരിച്ചില്ലെങ്കില്‍ ഹോട്ടലുകള്‍ അടച്ചുപൂട്ടിക്കുമെന്നും സംഘം മുന്നറിയിപ്പു നല്‍കി.
സമീപത്തെ മറ്റൊരു ഹോട്ടലിന്റെ അടുക്കള വൃത്തിഹീനമായി പ്രവര്‍ത്തിച്ചതിനാല്‍ ഈ ഹോട്ടലിന് നോട്ടീസ് നല്‍കി. ഒരാഴ്ചയ്ക്കകം ഇതിന്റെ പോരായ്മകള്‍ പരിഹരിക്കണമെന്നും സംഘം നിര്‍ദേശിച്ചു.
ഇനി മുതല്‍ എല്ലാ ആഴ്ചയ#ിലും ഹോട്ടലുകളില്‍ തുടര്‍പരിശോധന ഉണ്ടാകുമെന്ന് പരിശോധനക്ക് നേതൃത്വം നല്‍കിയ ഹെല്‍ത്ത് ഇന്‍സ്‌പെക്ടര്‍ സ്‌നേഹലത പറഞ്ഞു.  
ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ ജയകൃഷ്ണന്‍, ശ്യാംകുമാര്‍, വിനോദ്, അന്‍ഷാദ് എന്നിവരും പരിശോധന സംഘത്തില്‍ ഉണ്ടായിരുന്നു.