കൊച്ചി: ശബരിമലയില്‍ സ്ത്രീകളുടെ വ്രതകാലം 21 ദിവസമാക്കണമെന്നും ഇത് സംബന്ധിച്ച് തന്ത്രിക്ക് നിര്‍ദ്ദേശം നല്‍കണമെന്നും ആവശ്യപ്പെട്ട് സമര്‍പ്പിച്ച ഹരജി ഹൈക്കോടതി തള്ളി. എം.കെ.നാരായണന്‍ പോറ്റിയാണ് ഹരജിയുമായി കോടതിയെ സമീപിച്ചത്. എന്നാല്‍ ഇത് സംബന്ധിച്ച നിര്‍ദ്ദേശം നല്‍കാന്‍ തന്ത്രിക്ക് അധികാരമുണ്ടോ എന്ന് കോടതി ചോദിച്ചു. ഹരജിക്കാരനോട് സുപ്രീം കോടതിയെ സമീപിക്കാനും ഹൈക്കോടതി നിര്‍ദ്ദേശിച്ചു.

അതേസമയം, ശബരിമല വിഷയത്തില്‍ സുപ്രിം കോടതിയില്‍ നിലനില്‍ക്കുന്ന പുനപരിശോധനാ ഹരജികളില്‍ തീരുമാനമുണ്ടാകുന്നത് വരെ ശബരിമലയില്‍ സ്ത്രീ പ്രവേശനം തടയണമെന്ന് ആവശ്യപ്പെട്ട് നല്‍കിയ ഹരജിയും ഹൈക്കോടതി തള്ളി. സുപ്രിം കോടതി വിധിക്കെതിരെ ഹൈക്കോടതിയില്‍ വരുന്ന ഹരജികള്‍ പരിഗണിക്കാന്‍ ആവില്ലെന്നായിരുന്നു കോടതിയുടെ നിലപാട്. ഇതേ ആവശ്യം ഉന്നയിച്ച് സുപ്രിം കോടതിയിലും ഹരജി നല്‍കിയിട്ടുണ്ടെന്ന കാര്യം ഹൈക്കോടതി ചൂണ്ടിക്കാട്ടി.